काठमाडौं (हाम्रो खेलकुद) – गोल्डेनगेट कलेज र डिएभी कलेज राजधानीमा जारी दोस्रो संस्करणको युनिभर्सिटी क्रिकेट कप टी–ट्वान्टी क्रिकेट प्रतियोगिताको सेमिफाइनलमा प्रवेश गरेका छन् ।

दुई टोलीको सेमिफाइनल यात्रासँगै प्रतियोगिताको सेमिफाइनल समिकरण पुरा भएको छ । यसअघि कसमस र टियुले अन्तिम चारमा स्थान बनाएका थिए । शुक्रबार पहलो सेमिफाइनलमा टियु र कसमस कलेज तथा दोस्रो सेमिफाइनलमा गोल्डेनगेट र डिएभी कलेजबीच खेल हुनेछ ।

त्रिवि क्रिकेट मैदान कीर्तिपुरमा बुधबार भएको क्वार्टरफाइनलको पहिलो खेलमा गोल्डेनगेटले जनता कलेजमाथि ६२ रनको सहज जित निकाल्दै अन्तिम चारमा स्थान बनाउन सफल भएका हो । १ सय ७२ रनको लक्ष्य पछ्याएको जनता कलेज ४ विकेटको क्षतिमा १ सय ९ रनमा समेटियो । जनताका लागि अंकत आरजे र निराजन केसीले समान २६ रन बनाएपनि टिमलाई जिताउन सकेन । सम्वर्धन दवाडी १४ रनमा नटआउट रहे । गोल्डेनगेटका किशोर महतोले दुई विकेट लिए ।

यसअघि टस जितेर पहिले ब्याटिङ गरेको गोल्डेनगेट कलेजले ५ विकेट गुमाएर १ सय ७१ रनको सम्मानजनक योगफल तयार पारेको थियो । गोल्डेनगेटका भुपेन्द्र थापाले ५७ रनको अर्धशतकीय इनिङ्स खेले । रवि कुमार शाह ४२ रनमा नटआउट रहे । सञ्जय श्रेष्ठले ४२ रनको योगदान दिए । जनताका सागर क्षेत्र, विनोद शाही र सम्वर्धन दवाडीले समान १ विकेट हात पारे ।

बुधबारै भएको अर्काे खेलमा डिएभीले साविकको विजेता शंकरदेव कलेजमाथि ८ विकेटको फराकलो जित निकाल्दै अन्तिम चारमा स्थान बनाउन सफल भयो । शंकरदेवले दिएको १ सय ६९ रनको लक्ष्य डिएभीले १५ ओभर २ बलमा २ विकेट गुमाएर पुरा गर्‍यो । डिएभीको जितमा आदिल खानले सर्वाधिक ७७ रनको योगदान दिए ।

सन्जय बस्नेत ३६ तथा सुमित महर्जन २८ रनमा नटआउट रहँदा ओपनर गौरव खड्काले २२ रन जोडे । सुनिल धमला र प्रेम तामाङले समान १ विकेट लिए । टस हारेर पहिले ब्याटिङको निम्तो पाएको शंकरदेवले ५ विकेट गुमाएर १ सय ६८ रनको सम्मानजनक योगफल तयार पारेको थियो । प्रदिप ऐरी ५० रनमा नटआउट रहँदा सुनिल धमला र आयुष्मान बलमे समान ४४ रन जोडेका थिए । सुवेन्दु पाण्डेले १० रन जोडे । डिएभीका दीलिप यादव र सुमित झाले समान २ विकेट हात पारे ।