काठमाडौं (हाम्रो खेलकुद)– धनगढी प्रिमियर लिग (डिपिएल)–२ ले अन्तर्राष्ट्रिय क्रिकेट परिषद् (आइसीसी) बाट मान्यता पाएको छ । आयोजक धनगढी क्रिकेट एकेडेमी (डिसिए) ले बुधबार एक विज्ञप्ति जारी गर्दै आइसीसीबाट मान्यता पाएको उल्लेख गरेको छ ।

आइसीसीका सिनियर क्रिकेट अपरेशन म्यानेजर सिलिभ हिट्जककले पठाएको पत्रमा आइसीसीले आफ्ना सम्पूर्ण सदस्य राष्ट्रहरुलाई रुस्लान डीपीएल–२ लाई आइसीसीको मान्यता रहेको जानकारी दिएको उल्लेख गरेको छ । आइसीसीको मान्यतासँगै प्रतियोगितामा सहभागी टोलीले कुनैपनि उच्चस्तरका विदेशी खेलाडीलाई टोलीसँग अनुबन्ध गर्न सहज भएको छ ।

रुस्लान डीपीएल–२ लाई आइसीसीले मान्यता दिँदै आफ्ना सम्पूर्ण सदस्यहरुलाई जानकारी गराउँनुले नेपाली घरेलु प्रतियोगिताले अन्तर्राष्ट्रिय स्तरमा थप महत्व र उचाई हासिल गरेको डिसिएका अध्यक्ष सुवास शाहीले बताएका छन् । डिपिएल–२ आगामी चैत्र १७ गतेदेखि धनगढीमा शुरु हुदैछ ।

प्रतियोगितामा काठमाडौं गोल्डेन्स, विराटनगर किंग्स, रुपेन्देही च्यालेन्जर्स, सिवाइसी अत्तरिया, महेन्द्रनगर युनाइटेड र टीम चौराह धनगढीले सहभागिता जनाउँदैछन् । सर्वाधिक पुरस्कार राशीको प्रतियोगिताको विजेताले २५ तथा उपविजेताले १० लाख पाउँनेछन्। यस्तै तेस्रो हुने टीमले ३ तथा चौथो हुने टोलीलाई २ लाख रुपैयाँ पाउनेछ ।