काठमाडौं (हाम्रो खेलकुद) – कसमस कलेज र त्रिभुवन विश्व विद्यालय (टियु) राजधानीमा जारी दोस्रो संस्करणको युनिभर्सिटी क्रिकेट कप टी–ट्वान्टी क्रिकेट प्रतियोगिताको सेमिफाइनलमा प्रवेश गरेका छन् । कसमसले न्यु समिट कलेजलाई तथा टियुले क्यारिबियन कलेजलाई पराजित गर्दै प्रतियोगिताको अन्तिम चारमा स्थान बनाउन सफल भएका हुन् ।

त्रिवि क्रिकेट मैदान कीर्तिपुरमा मंगलबार भएको क्वार्टरफाइनलको पहिलो खेलमा कसमसले न्यु समिट कलेजमाथि ४७ रनको जित निकाल्यो । १ सय ५० रनको लक्ष्य पछ्याएको न्यु समिटले ८ विकेट गुमाएर १ सय २ रनमात्र बनाउन सक्यो । न्यु समिटका करण शाहले ३१ तथा शरद खड्काले २५ रन बनाउनुबाहेक अन्य ब्याट्सम्यानले राम्रो खेल्न सकेनन् । कसमसका कुशल भुर्तेले ३ विकेट लिए ।

यसअघि टस हारेर पहिले ब्याटिङको निम्तो पाएको कसमसले ९ विकेटको क्षतिमा १ सय ४९ रनको मध्यम योगफल तयार पारेको थियो । खराब सुरुवात गरेको कसमसका लागि मध्यक्रमका ब्याट्सम्यान कमलसिंह ऐरीले ५६ रनको अर्धशतकीय इनिङ्सको योगदान दिए । योगेन्द्र सिंह कार्कीले २५ तथा सन्दिप जोराले २४ रन जोडे । न्यु समिटका जनमिजय यादवले ४ विकेट लिए । राजेश यादव र अनुप श्रेष्ठले समान २ विकेट लिए ।

मंगलबारै भएको अर्काे खेलमा टियुले क्यारिविन कलेजलाई १ सय ३६ रनको फराकिलो अन्तर पराजित गर्दै सेमिफाइनलमा स्थान बनायो । टियुले दिएको २ सय ८ रनको विशाल लक्ष्य पछ्याएको क्यारिबियन १९ ओभर ३ बलमा ७१ रनमा समेटियो । क्यारिबियनका अमित कुशवाहाले १४ तथा जय प्रकाश गुप्ताले १३ रन बनाउनु बाहेक अन्य ब्याट्म्यानले दोहोरो अंकमा रन बटुल्न सकेनन् । क्यारिबियनलाई सस्तैमा समेट्न पृथु बास्कोटा, विक्रम सोव र सागर ढकालले समान ३ विकेट लिए । क्षितिज सिंहले १ वकेट हात पारेका थिए ।

यसअघि टस जितेर पहिले ब्याटिङ गरेको टियुले इशान पाण्डेको नटआउट १ सय २६ रनको शतकीय इनिङ्सको मद्दतमा २ विकेट गुमाएर २ सय ७ रनको विशाल योगफल बनाएको थियो । ७० बल खेलेका इशानले १६ चौका र ५ छक्का प्रहार गरे । पृथु बास्कोटा ३२ र सुवास खकुरेलले २४ रन जोडे । सोनु तामाङ १२ रनमा आउट भएका । टकसाका सिम्खडाले २ विकेट लिए । प्रतियोगिता अन्तर्गत बुधबार क्वार्टरफाइनलको खेल शंकरदेव कलेज र डिएभी तथा ओमेघा कलेज र गोल्डेनगेट कलेजबीच खेल हुनेछ ।