काठमाडौं (हाम्रो खेलकुद) – साविकको विजेता शंकरदेव कलेज र कसमस कलेज राजधानीमा जारी दोस्रो संस्करणको युनभर्सिटी क्रिकेट कप टी–ट्वान्टी क्रिकेट प्रतियोगिताको क्वार्टरफाइनलमा प्रवेश गरेका छन् ।

त्रिवि क्रिकेट मैदान कीर्तिपुरमा आइतबार भएको खेलमा शंकरदेवले युनिग्लोब कलेजमाथि ६५ रनको जित निकाल्दै अन्तिम आठमा पुग्न सफल भएको हो । शंकरदेवले दिएको १ सय ३८ रनको लक्ष्य पछ्याएको युनिग्लोबले नर्धारित २० ओभरमा ८ विकेट गुमाएर ७२ रनमात्र बनाउन सक्यो । रोवेश पाण्डे र रौनक ढुंगानाले समान १७–१७ रन बनाउनुबाहेक अन्य ब्याट्सम्यानले दोहोरो अंकमा रन जोड्न सकेन । शंकरदेवका रामनरेश गिरीले २ तथा प्रदिप ऐरी र विनोद भट्टराईले समान १–१ विकेट लिए ।

यसअघि टस हारेर पहिले ब्याटिङको निम्तो पाएको शंकरदेवले १ सय ३७ रन बनाएको थियो । उसका लागि सुवेन्दु पाण्डेले सर्वाधिक ४१ रनको योगदान दिए । प्रेम तामाङ २६ तथा आयुष्मान बमले २५ रन जोड्दा सुनिल धमलाले १४ रन बनाए । युनिग्लोबका रौनक ढुंगाना र निर्मल क्षेत्रीले समान ३–३ विकेट लिए । अभिनव यादवले २ विकेट लिए । शंकरदेवका सुवेन्दु पाण्डे खेलको म्यान अफ दि म्याच घोषित भए ।

यो समूहबाट डिएभी र जनता कलेजले क्वार्टर फाइनलमा स्थान बनाइसकेका छन् । त्रिवि क्रिकेट मैदानमा आइतबारै भएको अर्काे खेलमा कसमसले नेपाल कमर्श क्याम्पसमाथि ५ रनको जित निकाल्दै अन्तिम आठमा पुग्न सफल भयो ।

कसमसले दिएको १ सय ७१ रनको लक्ष्य पछ्याएको नेपाल कमर्श क्याम्पसले ६ ओभर १ बल खेलेर २ विकेट गुमाएर ५४ रन बनाएको अवस्थामा वर्षा भएपछि खेल शुरु हुन नसक्दा डिएल पद्धतिमा ५ रनको जित निकालेको हो । कमर्शका सुर्य बोहराले २३ रन बनाए । प्रकाश विष्ट १४ रनमा नटआउट रहँदा सुमन उदयले १० रन बनाए ।

यसअघि टस जितेर पहिले ब्याटिङ गरेको कसमसले ८ विकेटको क्षतिमा १ सय ७० रनको योगफल तयार पारेको थियो । कसमसका लागि कुशल भुर्तेलले ३९ रन तथा सन्दिप जोराले ३८ रन जोडे । हिमांशु दत्त ३३ तथा कमल सिंह ऐरीले २७ रनको योगदान दिए । कमर्शका बसन्त खत्री, प्रकाश विष्ट र इन्द्रकमल मानन्धरले समान २–२ विकेट लिए ।

प्रतियोगिता अन्तर्गत सोमबार टियु ‘ए’ र ट्रिटन कलेज तथा गोल्डेन गेट र सेट जेभियरबीच खेल हुनेछ । नकआउटका आधारमा भैरहेको प्रतियोगितामा विभिन्न १६ कलेजले सहभागिता जनाएका छन् ।