काठमाडौं (हाम्रो खेलकुद) – जारी आइसीसी विश्वकप छनोट प्रतियोगिता २०१८ मा नेपालले आफ्नो तेस्रो लगातार हार बेहोरेको छ । आजको खेलमा नेपाल अफगानिस्तानसँग ६ विकेटले पराजित भएको हो । यस जितसँगै अफगानिस्तानले प्रतियोगितामा पहिलो जित दर्ता गरेको छ ।

१ सय ९५ रनको लक्ष्य पछ्याएको अफगानिस्तानले सो लक्ष्य ३८ ओभर ४ बलमै पुरा गर्न सफल रह्यो । अफगानिस्तानका लागि नजिबुलाह जद्रानले अवजित ५२ रन बनाए । त्यस्तै रहमत शाहले ४६ रनको योग्दान दिएका थिए । कप्तान रशिद खानले २१ रन बनाए भने मोहम्मद नबिले ३४ रन जोडे । नेपालका लागि दिपेन्द्र ऐरीले दुई विकेट लिए ।

यसाघि टस जितेर पहिले ब्याटिङ रोजेको नेपाल ४९ ओभर ५ बलमा अलआउट हुँदै १ सय ९४ रन बनाउन सफल भएको थियो । नेपालका लागि कप्तान पारस खड्काले शानदार ब्याटिंग गर्दै ७५ रन बनाएका थिए । लिस्ट ए क्रिकेटमा पारसको यो आठौं अर्धशतक हो । ओपनर अनिल शाह ७ रनमा आउट भएपछि पारस र उपकप्तान ज्ञानेन्द्र मल्लबीच ९२ रनको साझेदारी बनेपनि ज्ञानेन्द्रले ६९ बलमा २४ रन मात्र बनाएका थिए ।

त्यस्तै दीपेन्द्र सिंह ऐरीले ३२ रन तथा आरिफले २३ रन जोडेका थिए । अघिल्लो २ खेलमा टोलीमा स्थान नपाएका करण केसी ६ रनमा आउट भएका थिए भने वसन्त रेग्मी ९ रनमा नट आउट रहे । नेपाली ब्याट्सम्यानहरुलाई रोक्ने क्रममा मोहम्मद नावीले ४ विकेट लिए भने राशिद खानले ३ तथा शपुद जद्रानले पनि २ विकेट लिएका थिए ।

भिडियो – पारसको अर्धशतक