काठमाडौं (हाम्रो खेलकुद) – डिएभी कलेज र न्यु समिट कलेजले आजबाट शुरु भएको दोस्रो संस्करणको युनिभर्सिटी क्रिकेट कप टि–ट्वान्टी क्रिकेट प्रतियोगितामा विजयी सुरुआत गरेका छन् ।

त्रिवि क्रिकेट मैदानमा शुक्रबार भएको पहिलो खेलमा डिएभीले त्रिभुवन विश्व विद्यालयको ‘बी’ टिमलाई ५४ रनले पराजित गर्दै विजयी शुरुवात गरेको हो । डिएभीले दिएको १ सय ६७ रनको लक्ष्य पछ्याएको त्रिभुवन विश्व विद्यालयको ‘बी’ टिमले निर्धारित २० ओभरमा ५ विकेट गुमाएर १ सय १२ रनमात्र बनाउन सक्यो । त्रिभुवन विश्व विद्यालयको ‘बी’ टिमका बीरेन्द्र सिंह कार्कीले नटआउट २८ रन बनाएपनि टिमलाई जिताउन सकेन । महेश खत्री २६ रनमा आउट भए । डिएभीका सञ्जय बस्नेतले ३ विकेट लिए ।

यसअघि टस हारेर पहिले ब्याटिङको निम्तो पाएको डिएभीले ५ विकेट गुमाएर १ सय ६६ रनको मध्यम योगफल तयार पारेको थियो । डिएभीका लागि आदिल खानले सर्वाधिक ८० रन बनाए । सुधिर चौधरी २९ तथा गौरव खड्का २४ रनमा नटआउट रहे । विश्व विद्यालयका दीपेन्द्र बहादुर चन्दले तीन विकेट लिए । डिएभीका आदिल खान खेलको म्यान अफ दि म्याच घोषित भए ।

शुक्रबारै भएको अर्काे खेलमा न्यु समिटले वन कलेजलाई ६ विकेटले पराजित गर्यो । वन कलेजले दिएको ८७ रनको झिनो लक्ष्य न्यु समिटले ४ विकेट गुमाएर पुरा गर्यो । न्यु समिटका शुभम अग्रवालले ३० तथा मिलन क्षेत्रीले २० रनको योगदान दिए । करन शाह १३ रनमा नटआउट रहे । वनका टेसप क्यापले २ विकेट लिए । यसअघि टस जितेर पहिले ब्याटिङ गरेको वन कलेजले सबै विकेट गुमाएर ८६ रनमात्र बनाउन सक्यो । निमा छिरिङले ३७ रन बनाएपनि अन्य ब्याट्सम्यान न्यु समिटको धारिलो बलिङमा टिक्न सकेनन् । वनलाई सस्तैमा समेट्न जमिजय यादवले ३ तथा शरद खड्काले २ विकेट हात पारे ।