धनगढी (हाम्रो खेलकुद) – धनगढीको सिद्धार्थ सिसु सदनले निष्ट लिटिल फ्लावर प्रिमियर लिगको उपाधि जितेको छ । धनगढीको फाप्ला क्रिकेट मैदानमा आइतबार कञ्चनपुरको लिटिल बुद्धमाथि ९ विकेटको जित हासिल गर्दै सिद्धार्थ च्याम्पियन बनेको हो । सिद्धार्थले ५० हजार र लिटिल वुद्धले २५ हजार रुपैयाँ प्राप्त गर्यो ।

टस जितेर पहिले ब्याटिङ गरेको कञ्चनपुरको लिटिल बुद्धले निर्धारित २० ओभरको खेलमा १७.५ ओभरमा सबै विकेट गुमाउँदै ७७ रन मात्र बनायो । रमेश भट्टले १५ र भीम सार्कीले १४ रन बनाए । अन्य कुनै ब्याट्सम्यानले दोहोरो अंक बटुल्न सकेनन् । लिटिल बुद्धलाई कम रनमै समेट्ने क्रममा सिद्धार्थका लागि दिपेन्द्र थापा र किरण ठगुन्नाले समान २ विकेट लिएका थिए ।

७८ रन विजय लक्ष्य लिएर मैदान ओर्लेको सिद्धार्थले १०.३ ओभरमा एक विकेट गुमाएर लक्ष्य प्राप्त गर्यो । सहज जितका लागि किरण ठगुन्नाले अर्धशतकिय पारी खेले । किरणले ५४ रन बनाए । दिपेन्द्र थापाले २० रन जोडे । लिटिल बुद्धका लागि विकास आग्रीले एक विकेट लिए । सिद्धार्थ सिसुका दीपेन्द्र थापा म्यान अफ दी सिरिज चुनिए भने लिटिल बुद्धका रमेश भट्ट उत्कृष्ट ब्याट्सम्यान, सिद्धार्थका खड्ग बोहोरा उत्कृष्ट बलर घोषित भए ।

धनगढीको लिटिल फ्लावर ईङलिस स्कुलको आयोजना र निष्ट कलेजको प्रायोजनमा फागुन १५ गतेदेखि सुरु भएको थियो । विजेता टोलीका खेलाडीलाई निष्ट कलेजका संस्थापक प्रिन्सिपल तथा निष्ट फाउण्डेसनका अध्यक्ष डाक्टर माधव प्रसाद वरालले पुरस्कार वितरण गरे । प्रतियोगिताको अर्को तेस्रो संस्करणको नगद पुरस्कार राशी वढाउने र विद्यालय स्तरीय क्रिकेट प्रतियोगितालाई अझ उत्कृष्ट रुपमा आयोजना गर्ने प्रतियोगिताका संयोजक रामचन्द्र शाहीले बताए ।