काठमाडौं (हाम्रो खेलकुद) – जिम्बावेमा जारी विश्वकप छनोट २०१८ अन्तर्गत आज नेपाल र जिम्बावे भिड्दै छन् । टस जितेर पहिले ब्याटिङ रोजेको जिम्बावेले निर्धारित ५० ओभरमा ६ विकेट गुमाई ३ रन ८० रन बनाएको छ । जिम्बावेका लागि मिडलअर्डर ब्याट्सम्यानद्वय बेन्डन टेलर र शिकन्दर राजा दुवैले शतकीय पारी खेले ।

जिम्बावेका दुवै ओपनरले निकै विष्फोटक सुरुवात गरेका थिए । जिम्बावेको एक समय ७ ओभरमा विना क्षति ७७ रन थियो । तर बलिङ गर्न आएको पहिलो बलमै सन्दिप लामिछानेले सेफास झुवाओलाई आउट गर्दै नेपाललाई केही राहत दिलाए । झुवाओले २३ बलमा ४१ रन जोडे भने अर्का ओपनर सोलोमन मिरेले ४१ बलमा ५२ रन जोडे । तेस्रो नम्बरमा ब्याटिङ गर्न आएका ह्यामिल्टन मासाकाड्जाले १७ रन बनाएका थिए भने क्रेग एर्भिनले ३४ रनको पारी खेले । एर्भिनलाई आज डेब्यु गरिरहेका ललित राजवंशीले आउट गरे ।

३१ औं ओभरमा २०० रन हुँदा जिम्बावेको चौथो विकेट झर्दा नेपालले खेलमा पुनरागमन गर्ने संकेत दिएको थियो । तर अनुभवी ब्याट्सम्यान ब्रेन्डन केलर र उच्च लयमा रहेका सिकन्दर राजाको बलियो साझेदारीमा जिम्बावेले नेपाललाई विशाल लक्ष्य दिन सफल भयो । राजाले ६६ बलमा ९ छक्का प्रहार गर्दै १ सय २३ रन बनाए भने टेलरले ९१ बलमा १०० रनको योग्दान दिए । राजा र टेलरलाई ४९ औं ओभरमा सोमपाल कामीले लगातार आउट गरेका थिए ।

नेपालका बलरहरु आज निकै खर्चिलो सावित भए । नेपालका लागि वसन्त रेग्मी र सोमपालले दुई विकेट लिए भने सन्दिप लामिछाने र ललित राजवंशीले एकएक विकेट हात पारे । नेपाल अब केहि बेरमा ब्याटिङ गर्न उत्रिनेछ ।