काठमाडौं (हाम्रो खेलकुद) – आइसीसी विश्वकप छनोट २०१८ अन्तर्गत आज नेपालले आफ्नो पहिलो खेल टेष्ट राष्ट्र जिम्बावेसँग खेल्दै छ । जिम्बावेको बुलावायोमा खेलिने सो खेल नेपाली समयअनुसार दिउसोको १.१५ बजे सुरु हुने छ । जिम्बावेले टस जितेर पहिले ब्याटिङ रोजेको छ । नेपालका लागि आज स्पिनर ललित नारायण राजवंशीले डेब्यु गर्दै छन् । आज ललितले नेपालको सुरुवाती ११ मा करण केसीको स्थान लिएका छन् ।

नेपालले हालै सम्पन्न डिभिजन-२ प्रतियोगितामा उपविजेता बन्दै विश्वकप छनोटमा स्थान सुरक्षित बनाएको हो । नेपाल विश्वकप छनोटको समूह ‘बि’मा आयोजक जिम्बावे, अफगानिस्तान, स्कटल्याण्ड र हङकङको सामना गर्ने छ । पहिलो खेलमा नेपालले टेष्ट मान्यता प्राप्त राष्ट्र जिम्बावेको सामना गर्दै छ ।

जिम्बावेले सन् १९९२ मा टेष्ट राष्ट्रको मान्यता पाएको थियो । जिम्बावेले १९८३ देखि २०१५ को अघिल्लो विश्वकपसम्म निरन्तर सहभागिता जनाएको छ । जिम्बावे एक दिवसीय वरियतामा एघारौं स्थानमा रहँदै विश्वकप छनोटमा प्रवेश गरेको थियो ।

जिम्बावेको टोली अनुभवी रहेको छ र उसलाई घरेलु मैदानको फाइदा पनि हुने छ । तर, केहि समययता जिम्बावेलाई स्पिन बलिङ खेल्न समस्या देखिएकाले नेपालले त्यसलाई आफ्नो फाइदाको रुपमा लिन सक्छ ।

नेपालको सुरुवाती ११: ज्ञानेन्द्र मल्ल, दिलिप नाथ, पारस खड्का, दिपेन्द्र ऐरी, शरद भेषावकर, आरिफ शेख, रोहित पौडेल, वसन्त रेग्मी, सोमपाल कामी, ललित राजवंशी, सन्दिप लामिछाने