विविध सुवेदी 

काठमाडौं – नेपालले हालै सम्पन्न विश्व क्रिकेट लिग डिभिजन-२ प्रतियोगितामा उपविजेता बन्दै विश्वकप छनोटमा आफ्नो स्थान सुरक्षित पारेको  थियो । डिभिजन-२ मा नेपालका लागि नायक रहे युवा स्पिनर सन्दिप लामिछाने । सन्दिप प्रतियोगिताभरी सर्वाधिक १७ विकेट लिँदै म्यान अफ द टोर्नामेन्ट पनि घोषित भएका थिए ।

सन्दिपलाई नेपालका कप्तान पारस खड्काले महत्त्वपूर्ण हतियार स्वरुप प्रयोग गरेका थिए र सो योजना नेपालका लागि सफल पनि सावित भएको देखियो । डिभिजन-२ मा सन्दिपको बलिङमा विशेषता उनको आत्म विश्वास देखियो । १७ वर्ष उमेरका सन्दिपले आफ्नो उमेरभन्दा निकै परिपक्व प्रदर्शन गरे ।

डिभिजन-२ प्रतियोगिता सुरु हुन अघि सन्दिपलाई दिल्ली डेयरडेभिल्सले आबद्ध गर्दै आइपिएल खेल्ने पहिलो नेपाली खेलाडी बनाए । त्यो नेपाली क्रिकेट र सन्दिप आफैँका लागि एक ऐतिहासिक क्षण थियो । दिल्ली डेयरडेभिल्सको निर्णय तथा अवसरलाई सन्दिपले आफ्नो प्रदर्शनबाट न्याय दिनु थियो । प्रतियोगितामा उनको लगातार उत्कृष्ट प्रदर्शन र उत्कृष्ट खेलाडीको ट्रफीले उनले त्यो सिद्ध गरे । एक किसिमले आइपिएल जस्तो मञ्च पाउनु सन्दिपको लागि निकै ठूलो प्रोत्साहिन थियो जुन उनको प्रदर्शनमा पनि झल्कियो ।

अब मार्च ४ देखि नेपालसामु अर्को खुड्किलो छ । नेपालले जिम्बावेमा विश्वकप छनोट खेल्दै छ र यस प्रतियोगितामा पनि टोलीको महत्त्वपूर्ण सदस्यका रुपमा स्थापित भईसकेका सन्दिपको प्रदर्शन नेपालको लागि निर्णायक सावित हुन सक्छ । प्रतियोगिता सुरु हुनु ३ दिन अघि उनले थप प्रत्साहन प्राप्त गरेका छन् । उनलाई क्यारेबियन प्रिमियर लिग (सीपिएल) खेल्न सेन्ट किट्स एण्ड नेभिस प्याट्रिएट्सले आबद्ध गरेको छ ।

उनले सेन्ट किट्स एण्ड नेभिस प्याट्रिएट्समा विश्वका केही मानिएका हस्तीहरुसँग खेल्ने छन् । प्याट्रिएट्सको नेतृत्व विश्व क्रिकेटमा आफ्नो आक्रामक ब्याटिङका लागि चिनिने क्रिस गेलले गर्ने छन् । त्यस्तै २०१६ टि-२० विश्वकप फाइनल खेलको फाइनल ओभरमा ४ छक्का प्रहार गर्दै क्रिकेट प्रशंसकहरुलाई आश्चर्यचकित पारेका कार्लोस ब्रेथवेट पनि प्याट्रियट्सबाट खेल्दै छन् । अष्ट्रेलियाका बेन कटिङ र नेदरल्यान्ड्सका टम कुपरको विश्व क्रिकेटमा अनुभव पनि प्याट्रियट्सलाई फाइदाजनक हुने देखिन्छ ।

यसरी सन्दिप विश्वकप छनोटजस्तो महत्त्वपूर्ण प्रतियोगिता अगाडी सीपिएलमा जोडिनाले उनको मनोबल पनि पक्कै उच्च भएको छ । त्यसमाथि अहिले विश्व किकेटले नै सन्दिपमाथि आफ्नो नजर राख्दा उनलाई आफ्नो व्यक्तिगत प्रदर्शनले टोलीलाई सफलता दिलाउदै आफ्नो नाम अझै स्थापित गर्ने ठूलो मौका रहनेछ ।