काठमाडौं (हाम्रो खेलकुद) – जिम्बावेमा हुने विश्वकप छनोटको तयारी अन्तर्गतको पहिलो वर्म अप खेलमा टस जितेर ब्याटिंग रोजेको युएईले नेपाल समक्ष १ सय ७२ रनको लक्ष्य प्रस्तुत गरेको छ । वर्षाका कारण २९ ओभरमा घटाईएको खेलमा युएईले सबै विकेट गुमाउँदै १ सय ७१ रन बनाएको हो । मैदान पानीका कारण भिजेकोले खेल ढिलो सुरु भएको थियो । 

युएईले ५ रनमा पहिलो विकेट गुमाएको थियो । कप्तान रोहन मुस्तफा ४ रनमा आउट भएपनि अस्फक अहमद(४२) र गुलाम सबेर (३२) बीचको ६६ रनको साझेदारीको मद्धतले युएईको ब्याटिंगले लय समात्यो । नेपाली बलरहरुले युएईका शिर्षक्रमका ब्याट्सम्यानहरुलाई रोकेपनि अद्नान मुफ्ती र मुहम्मद उस्मानले विष्फोटक ब्याटिंग गर्दै युएईलाई बलियो रन तर्फ डोहोर्याए । मुफ्तीले २६ बलमा ३७ रन बनाए भने २० बलमा २६ रन बनाएका उस्मानलाई ललित भण्डारीले आउट गरे  ।अन्तिम २ ओभरमा युएईको ५ विकेट पतन भएको थियो ।

नेपालका लागि ललित भण्डारीले ४, करण केसीले ३ तथा ललित राजबंशीले २ विकेट लिए भने कप्तान पारस खड्काले १ विकेट लिए । करणले ३ विकेट अन्तिम ओभरमा लिएका थिए । नेपाल केहिबेरमा ब्याटिंग गर्नेछ ।

डिभिजन-२ को फाइनल खेलमा नेपाल युएईसँगै पराजित भएको थियो । तर समूह चरणमा भने नेपालले युएईलाई ४ विकेटले पराजित गरेको थियो । त्यसअघिका दुई खेलमा पनि युएईले जित हासिल गरेको थियो ।

डिभिजन-२ म उपविजेता रहँदै नेपाल विश्वकप छनोटको समूह ‘बि’ मा परेको छ । युएई रहेको समूह ‘ए’ भन्दा समूह ‘बि’ नै केहि सहज रहेको विश्लेषकहरुले बताएका छन् । समूह ‘बि’ मा नेपालले अफगानिस्तान, जिम्बावे, हंङकङ र स्कटल्याण्डसँग प्रतिस्पर्धा गर्ने छ ।

विश्वकप छनोटमा रहेका १० टोली मध्ये शीर्ष दुई टोली विश्वकप छनोटमा प्रवेश गर्ने छन् । डिभिजन-२ मा उत्कृष्ट प्रदर्शन गरेको टोलीलाई नेपालले यथावत राख्दै ललित नारायण राजवंशीको रुपमा एक खेलाडी थप पनि गरेको छ ।

नेपालले दोस्रो अभ्यास खेल हंङकङसँग मार्च १ मा खेल्ने छ । नेपालले विश्वकप छनोटको आफ्नो पहिलो खेल मार्च ४ मा घरेलु टोली जिम्बावेसँग खेल्ने छ ।