काठमाडौं (हाम्रोखेलकुद)- सानिमा बैंकले नेपाली राष्ट्रिय क्रिकेट टिमका महत्वपूर्ण सदस्य युवा खेलाडी सन्दीप लामिछानेको प्रायोजन रकम दोब्बर बनाएको छ । दुई वर्षअघि सन्दिपलाई मासिक २० हजार रुपैयाँ दिने सम्झौता गरेको सानिमाले बिहीबार पत्रकार सम्मेलनमार्फत सन्दिपलाई थप दुई वर्षको लागि मासिक ४० हजार रुपैया उपलब्ध गराउने सम्झौता गरेको हो ।

दुई वर्षको सम्झौतामा नविकरण भएपछि सानिमा बैंकका प्रमुख कार्यकारी अधिकृत (सिइओ) भुवन दाहालले विश्वकप छनोटमा पुग्नु नेपालका लागि खुशीको कुरा रहेको बताउदै पहिले दिइरहेको रकमलाई दोब्बर गर्ने निर्णय भएको बताए । उनले इण्डियन प्रिमयर लिग (आइपिएल) को सुरुवाती ११ मा परेर विकेट लिएको हेर्ने आशा रहेको बताए । नेपाली खेलाडीहरुको खेलेरै बाच्ने अवस्था अझैपनि श्रृजना भइनसकेको उल्लेख गर्दै दाहालले कर्पोरेट क्षेत्रको सहयोगमा खेलाडीहरुको स्तर उकास्न सहयोग पुग्ने विश्वास व्यक्त गरे ।

सन्दीपले दुई वर्षअघि आफूले १९ वर्षमुनिको विश्वकप खेलेर आउँदा सानिमा बैंकले गरेको सहयोगले अझै राम्रो प्रदर्शन गर्ने प्रेरणा मिलेको र आजको सम्झौता पश्चात आगामी दिनमा अझै राम्रो गर्ने प्रयास गर्ने प्रतिवद्धता जनाए । कार्यक्रममा बैंकका ब्रान्ड एम्बास्डरद्धय हरिवंश आर्चाय र मदनकृष्ण श्रेष्ठले सन्दीपलाई मायाँको चिनो प्रदान गरेका थिए ।