धनगढी (हाम्रो खेलकुद)– प्रधानमन्त्री कप महिला राष्ट्रिय क्रिकेट प्रतियोगिताकोे सम्पूर्ण तयारी पुरा भएको आयोजक कैलाली जिल्ला खेलकुद विकास समितिले जनाएको छ ।

राष्ट्रिय खेलकुद परिषद् (राखेप) को संयोजकत्व रहने प्रतियोगितामा साविकका पाँच विकास क्षेत्र र विभागिय टोली नेपाल एपिएफ क्लब गरि ६ टोलीको सहभागिता रहेको मंगलबार धनगढीमा आयोजित पत्रकार सम्मेलनमा प्रतियोगिता संयोजक बाबुराजा श्रेष्ठले जानकारी दिए ।

राखेपका सदस्य सचिव केशव विष्टले धनगढीको फाप्ला मैदानमा उद्घाटन गर्ने प्रतियोगिताको पहिलो खेलमा सुदूरपश्चिम र पश्चिमाञ्चलबीच प्रतिस्पर्धा गर्नेछन् । सहभागी टोलीलाई दुई समूहमा विभाजन गरिएको छ । समूहमा रहेका टोलीले एकअर्कासँग प्रतिस्पर्धा गरेपछि समूहका विजेता र उपविजेता अन्तिम चारमा पुग्नेछन् ।

प्रतियोगिताको विजेताले उपाधिसहित ५ लाख र दोस्रो हुने टोलीले २ लाख रुपैयाँ प्राप्त गर्नेछन् । वुमन अफ द सिरिजलाई १० हजार र अन्य चार विधाका उत्कृष्ट खेलाडीले जनही ५ हजार रुपैयाँ पाउनेछन् । सगरमाथा सिमेन्ट मुख्य प्रायोजक रहेको प्रतियोगिता सञ्चालनका लागि झन्डै साढे ३८ लाख रुपैयाँ खर्च हुने अनुमान गरिएको छ ।