जोहानसबर्ग (एजेन्सी) – भारतले दक्षिण अफ्रिका विरुद्धको तीन खेलको टि-२० श्रृंखलाको पहिलो खेल २८ रनले जितेको छ ।

पहिले ब्याटिङ गर्दै भारतले निर्धारित २० ओभरमा २ सय ३ रन जोड्न सफल भएको थियो । भारतका लागि ओपनर शिखर धवनले ७२ रनको शानदार पारी खेले । उनले ३९ बलमा १० चौका र २ छक्काको मद्दतमा भारतलाई राम्रो स्कोरमार्फत डोर्‍याएका थिए । अन्य ब्याट्सम्यानहरुमा रोहित शर्माले २१, सुरेश रैनाले १५, विराट कोहलीले २६, मनिश पाण्डेले २९, एमएस धोनीले १६ र हार्दिक पाण्डेयाले १३ रनको पारी खेलेका थिए ।

दक्षिण अफ्रिकाका लागि जुनियर डालाले २ विकेट लिन सफल भएका थिए भने जवाफमा घरेलु टोली दक्षिण अफ्रिकाले निर्धारित २० ओभरमा १ सय ७५ रन मात्र बनाउन सक्यो । टोलीका लागि ओपनर रिजा हेन्ड्रिक्सले सर्वाधिक ७० रन जोडे भने मिडल अर्डरका फर्हान बेहारडेनले ३९ रनको योग्दान दिंदा अन्य ब्याट्सम्यानले महत्त्वपूर्ण योग्दान दिन सकेनन् ।

भारतका लागि तीव्र गतिका बलर भुवनेश्वर कुमारले ५ विकेट लिएका थिए । त्यस्तै जयदेव उनाद्कट, हार्दिक पाण्डेया र युज्बेन्द्र चहलले पनि एकएक विकेट लिए । यसअघि दक्षिण अफ्रिकाले टेष्ट श्रृंखला २-१ ले जितेको थियो भने भारतले एक दिवसीय श्रृंखला ५-१ ले जित्न सफल भएको थियो । दोस्रो टि-२० खेल बुधबार खेलिने छ ।