काठमाडौं (हाम्रो खेलकुद) – बालुवाटार क्रिकेट क्लब खुकुरी च्यालेन्जर टी–ट्वान्टी क्रिकेट प्रतियोगिताको च्याम्पियन बनेको छ ।

कीर्तिपुरस्थित त्रिवि क्रिकेट मैदानमा शनिबार भएको फाइनल खेलमा काठमाडौं क्रिकेट ट्रेनिङ सेन्टर (केसीटीसी) लाई ८ रनले पराजित गर्दै बालुवाटार खुकुरी च्यालेन्जर टी–ट्वान्टी क्रिकेट प्रतियोगिताको च्याम्पियन बनेको हो । बालुवाटारले दिएको १ सय ५२ रनको लक्ष्य पछ्याएको केसीटीसीले ६ विकेट गुमाएर १ सय ४३ रन मात्र बनाउन सक्यो ।

केसीटीसीका लागि आदिल खानले ३२ रन जोडे । दुर्गेश थापा २१ रन, सुमित महर्जन १९, विवेक रानामगर १७ र सुधिर चौधरी १२ रनमा आउट भए । बालुवाटारका अमरसिंह राउटेलाले ४ तथा पृथु बास्कोटाले २ विकेट लिए । यसअघि टस जितेर पहिले ब्याटिङ गरेको बालुवाटारले ९ विकेट गुमाएर १ सय ५१ रनको मध्यम योगफल बनाएको थियो ।

बालुवाटारका लागि अमरसिंह राउटेलाले सर्वाधिक ३३ रन बनाए । प्रनित थापामगर २७ रनमा आउट हुदा पुथु बास्कोटा २५ रनमा पभेलियन फर्किए । सोनु तामाङले २३ रन जोडे । सुमित झाले ३ विकेट लिए । सञ्जय बस्नेतले २ तथा नन्दन यादवले १ विकेट लिए ।

च्याम्पियन बनेसँगै बालुवाटारले ३ लाख रुपैया प्राप्त गर्‍यो । उपविजेता बनेको केसीटीसीले १ लाख रुपैयमा चित्त बुझायो । बालुवाटारका क्षितिज पराजुली प्रतियोगिताको सर्वाेत्कृष्ट खेलाडी घोषित भए । उनले २० हजार रुपैया प्राप्त गरे । टिकापुर क्रिकेट क्लबका रविन्द्रजंग शाही उत्कृष्ट ब्याट्सम्यान, त्रिभुवन आर्मी क्लबका अविनास बोहोरा उत्कृष्ट बलर घोषित भए ।

वाइवाई जिएचसिएका सागर ढकाल प्रतियोगिताबाट उदियमान खेलाडी बने । सबैले समान १०–१० हजार प्राप्त गरे । विजयी खेलाडीहरुलाई नेपाल क्रिकेट संघ (क्यान) का पूर्व अध्यक्ष विनयराज पाण्डे र पूर्वउपाध्यक्ष उपेन्द्र भट्टराईले पुरस्कृत गरे । गत माघ १० गतेबाट शुरु भएको प्रतियोगितामा विभिन्न १६ क्लबहरुले लिगकम नकआउटका आधारमा प्रतिस्पर्धा गरेका थिए ।