काठमाडौं (हाम्रो खेलकुद) – विश्व क्रिकेट लिग डिभिजन २ अन्तर्गत हिजो क्यानाडालाई १ विकेटले पराजित गर्दै अंक तालिकामा शीर्ष स्थानमा पुगेको नेपालले उपाधिका लागि आज दोस्रो स्थानको युएईसँग खेल्दै छ । यसअघि राउन्ड रबिनको खेलमा नेपालले युएईलाई ५ विकेटले पराजित गरेको थियो । 

युएईले हिजै नामिबिया विरुद्ध जित दर्ता गर्दै तालिकामा दोस्रो स्थानमा उक्लेको थियो । नेपालको ५ खेलमा ४ जितसहित ८ अंक रहेको छ भने युएई, क्यानाडा र नामिबियाको समान ६ अंक भएपनि नेट रन रेटको आधारमा युएई दोस्रो भएको हो ।

डिभिजन २ को शिर्ष दुई टोली नेपाल र युएई दुवैले जिम्बावेमा हुने विश्वकप छनोटमा स्थान बनाई सकेका छन् । आजको विजेताले वेष्ट इन्डिज, आयरल्यान्ड र नेदरल्यान्ड्ससँगको समूहमा स्थान पाउनेछ भने उपविजेता अफगानिस्तान, स्कटल्यान्ड र हङकङसँगको समूहमा रहनेछ । राउन्ड रोबिन र त्यस पश्चात नक-आउट प्रणालीमा खेलिने सो प्रतियोगिताका १० टोलीमध्ये शीर्ष दुई टोली इङ्ग्ल्यान्ड र वेल्समा हुने २०१९ विश्वकपमा छनोट हुने छन् ।

त्यस्तै तेस्रो स्थानको खेलका लागि आज नै क्यानाडा र नामिबिया र पाँचौ र छैटौं स्थानका लागि केन्या र ओमान भिड्ने छन् । पाँचौ र छैटौं स्थानका दुवै टोली डिभिजन ३ मा घटुवा हुने भएकाले केन्या र ओमान डिभिजन ३ मा खेल्ने निश्चित भै सकेको छ ।