काठमाडौं (हाम्रो खेलकुद) – करन केसीले आज जादुयी ब्याटिङ गर्दै नेपाललाई क्यानाडामाथि १ विकेटको रोमाञ्चक जित दिलाए । यस जितसँगै नेपालको २०१९ क्रिकेट विश्वकप खेल्ने सम्भावना पनि जीवित भएको छ ।

करन क्रिजमा आउँदा नेपालको ८ विकेटको क्षतिमा १ सय ४४ रन थियो । नेपाल आफ्नो लक्ष्यभन्दा ५१ रनले टाढा रहेको थियो । उनी क्रिजमा आएलगत्तै आरिफ शेख आउट हुंदा नेपालको सम्भावना सकिएको अनुमान गरिएको थियो । तर त्यस पश्चात उनको प्रदर्शन चमत्कारभन्दा कम थिएन ।

४४ औं ओभरमा उनले एक चौका र एक छक्का प्रहार गरे पनि ४६ औं ओभरसम्म पनि नेपालको जित्ने आशा कम देखिन्थ्यो । ४८ औं ओभर आइपुग्दा उनले क्यानाडाका परवेजलाई विशाल छक्का प्रहार गर्दै नेपालको आशा अझै जीवित भएको ठोस सङ्केत दिएका थिए । ४९ औं ओभरमा फेरि एक छक्का र एक चौका हिर्काउँदै नेपाललाई लक्ष्य नजिक पुर्‍याए ।

अन्तिम ओभरमा परवेजले उनलाई केहि दबाबमा राख्न सफल भएका थिए । ४ वटा डट बलपछि करनले अर्को विशाल छक्का प्रहार गरे र त्यसपछि पाएको वाइडबाट स्कोर बराबर भएको थियो । अन्तिम बलमा एक रन लिँदै उनले एक ऐतिहासिक जित सुनिश्चित गरे ।

उनलाई आफ्नो पारीभरि सन्दिप लामिछानेले १८ बलमा ५ रन जोड्दै राम्रो साथ दिएका थिए । एक दिवसीयमा सो सन्दिपको सर्वाधिक स्कोर पनि हो । करनको यस ऐतिहासिक पारीका लागि उनले म्यान अफ द म्याच त पाए नै, लाखौ नेपालीहरुको बधाई पनि पाए ।