काठमाडौं (हाम्रो खेलकुद)– शान्तिनगर युथ क्लब र काठमाडौं क्रिकेट टे«निङ सेन्टर (केसीटीसी) राजधानीमा जारी खुकुरी च्यालेन्जर टी–ट्वान्टी क्रिकेट प्रतियोगिताको सेमिफाइनलमा पुगेका छन् । शान्तिनगरले त्रिभुवन आर्मी क्लबलाई ७ रन र केसीटीसीले वाई वाई जिएचसिएलाई २४ रनले हराउँदै अन्तिम चारको यात्रा तय गरेका थिए ।

मुलपानी क्रिकेट मैदानमा मंगलबार भएको पहिलो खेलमा १ सय २९ रनको लक्ष्य पछ्याएको आर्मी ८ विकेट गुमाएर १ सय २१ रनमात्र बनाउन सक्यो । आर्मीका लोकेन्द्र चन्दले २०, भुपेन्द्र थापा, इन्द्रकमल मानन्धर र दिपु कर्णले समान १५ रन जोडे । राजु रिजाल १७ रनमा आउट भए ।
शान्तिनगरका योगेन्द्र सिंह कार्कीले सर्वाधिक ४ विकेट लिए । मञ्जित श्रेष्ठले ३ तथा सुनिल धमालाले १ विकेट लिए ।

त्यसअघि टस हारेर पहिले ब्याटिङको निम्तो पाएको शान्तिनगरले ८ विकेटको क्षतिमै १ सय २८ रनको मध्यम योगफल तयार पारेको थियो । ओपनर सुनिल धमलाले ५१ रनको अर्धशतकीय इनिङ्स खेले । अमित श्रेष्ठले २३ र मञ्जित श्रेष्ठ १३ रनमा आउट भए । आर्मीका अभिनाश बोहराले ४ विकेट लिए । हरि झाले २ तथा राजेश पुलामी र चन्द्र साउदले समान १ विकेट लिए ।

अर्को खलमा केसीटीसीले दिएको १ सय २४ रनको चुनौती पछ्याएको जिएचसिएले १८ ओभर ४ बलमा सबै विकेट गुमाएर ९९ रनमात्र बनाउन सक्यो । प्रदिप ऐरीले २३, कमलसिंह ऐरीले २० र अभिषेक बस्नेतले २० रन जोडे । दिनेश बुढामगरले १२ जोड्नुबाहेक अन्य ब्याट्सम्यानले राम्रो खेल्न सकेनन् । जिएचसिएलाई सस्तैमा समेट्न केसीटीसीका सुमित झाले ३ विकेट लिए । प्रितम थापाले २ तथा दिलिप यादव, अदिल खान र सन्जय यादवले समान १ विकेट लिए ।

त्यसअघि टस जितेर पहिले ब्याटिङ गरेको केसीटीसीले ७ विकेटको क्षतिमा १ सय २३ रन जोडेको थियो । केसीटीसीका लागि ओपनर सुधिर चौधरीले ६४ रनको अर्धशतकीय इनिङ्स खेले । दुर्गेश थापाले ३५ रन बनाउदा अदिल खान १४ रनमा आउट भए । जिएचसिएका इशान पाण्डेले ३ र कमलसिंह ऐरीले १ विकेट लिए ।

प्रतियोगिता अन्तर्गत बुधबार दुई खेल हुदैछ । बालुवाटार क्रिकेट क्लबले मकवानपुर क्रिकेट क्लबसँग प्रतिस्पर्धा गर्दा रोयल पिसी फाइटरले अन्तर जिल्ला क्रिकेट क्लबसँग खेल्नेछ । दुवै खेल मुलपानी क्रिकेट मैदानमा हुनेछ । सेमिफाइनल र फाइनलका खेल भने कीर्तिपुर क्रिकेट मैदानमा हुने आयोजकले जनाएको छ ।