काठमाडौं (हाम्रो खेलकुद) – आज नेपाली राष्ट्रिय क्रिकेट टोली जारी विश्व क्रिकेट लिग डिभिजन-२ मा केन्याको सामना गर्दै छ । विश्वको आँखा फेरि पनि नेपाली युवा बलर सन्दिप लामिछानेमाथि हुने छ ।

यहि महिना दिल्ली डेयरडेभिल्ससँग आबद्ध भएका सन्दिप आइपिएल खेल्ने पहिलो नेपाली खेलाडि हुँदै छन् । आइपिएलमा छनोट भइसकेपछि धेरैको ध्यान सन्दिपको डिभिजन-२ को प्रदर्शनमा मोडिएको पनि छ ।

सन्दिपले सबै अपेक्षाहरुलाई भने अहिलेसम्म न्याय गरेका छन् । तीन खेलको समाप्तिमा सन्दिपले ९ विकेट लिइसके र उनी अहिलेसम्म सर्वाधिक विकेट लिने खेलाडिको सुचीमा अग्रस्थानमा रहेका छन् । यस बीच उनको औसत इकोनोमी पनि ३ को हाराहारीमा छ जुन एक दिवसीय खेलमा निकै प्रभावशाली प्रदर्शन हो ।

सन्दिपले नामिबियासँग ४ विकेट लिँदै म्यान अफ द म्याच भए भने उनले ओमानसँग २ विकेट लिए । हिजो युएईविरुद्ध बलिङ गर्न आएका पहिलो ओभरमै दुई बलमा दुई विकेट लिँदै खेललाई नेपालको पक्ष्यमा पार्न मद्दत गरेका थिए ।

नेपाल अहिले तालिकाको दोस्रो स्थानमा रहेको छ । नेपालले सो कायम राख्न सके विश्वकपको यात्रा थप सहज हुनेछ । कप्तान पारस खड्काले सन्दिपलाई आफ्नो खेल योजनाको महत्त्वपूर्ण हिस्साका रुपमा प्रयोग गर्दै आएका छन् । त्यसैले नेपालको अगाडिको यात्रामा सन्दिपको प्रदर्शनले ठूलो भाग खेल्ने पनि पक्का छ ।