काठमाडौं (हाम्रो खेलकुद) – रोयल पिसी फाइटर पराजित भएर पनि खुकुरी च्यालेन्जर टी–ट्वान्टी क्रिकेट प्रतियोगिताको क्वार्टरफाइनलमा पुग्न सफल भएको छ ।

आइतबार समूह चरणको अन्तिम खेलमा शीर्ष स्थानमा रहेको बालुवाटारसँग ६ विकेटले पराजित भएपनि समूह ‘बी’ को उपविजेताको रुपमा अन्तिम आठमा पुग्न सफल भएको हो ।

रोयलले दिएको १ सय ५९ रनको लक्ष्य बालुवाटारले १८ ओभर २ बलमा ४ विकेट गुमाएर पूरा गर्‍यो । बालुवाटारका लागि प्रनित थापामगरले ४८ रनको योगदान दिए । अमरसिंह राउटेला ३० रनमा आउट भए । सिद्धान्तराज शाही २३ रनमा नटआउट रहे । सुमन उदय १९ रन तथा पृथु बास्कोटा १२ रनमा पभेलियन फर्कदा सोनु तामाङ १२ नमा नटआउट रहे । रोयलका धिरज शाहीले २ तथा पुरन विकेले १ विकेट लिए ।

यसअघि मुलपानी क्रिकेट मैदानमा टस जितेर पहिले ब्याटिङ गरेको रोयलले ४ विकेट गुमाएर १ सय ५८ रनको योगफल बनाएको थियो । रविन जोशीले ६४ रनको अर्धशतकीय इनिङ्स खेले । सन्दिप सुनार ३२, सुवास खकुरेल २६ रनमा आउट हुदा प्रकाश विष्ट २४ रनमा नटआउट रहे । अमरसिंह राउटेला, क्षितिज सिंह, पृथु बास्कोटा र रितेश सिहले समान १ विकेट लिए ।

आइतबारै भएको अर्काे खेलमा त्रिमुर्ति ब्वाइजले आइओई पुल्चोकलाई ५ विकेटले पराजित गर्दै प्रतियोगितामा पहिलो र सान्त्वना जित निकाल्यो ।
आइओई पुल्चोकले दिएको १ सय ७१ रनको लक्ष्य त्रिमुर्तिले १९ ओभर ४ बलमा ५ विकेट गुमाएर पूरा गर्‍यो । त्रिमुर्तको जितमा जीवन लम्सालले १ सय ३१ रनको अविजित इनिङ्स खेले । ७८ बल खेलेका जीवनले १३ चौका र ४ छक्का प्रहार गरे । कौशल मिश्र १५ र दिपेन्द्र मगर १३ रनमा आउट भए । आयुस पोखरेल, सुयस अर्याल, नवराज न्यौपाने र मनिष ज्ञवालीले समान १ विकट लिए ।

यसअघि टस जितेर पहिले ब्याटिङ गरेको पुल्चोकले गौरव खड्काको १ सय १६ रनको नटआउट शतकीय रनको योगदानमा १ सय ७० रनको योगफल तयार पारेको थयो । निशुव लुइटेलले ३१ रन जोडे । दिनेश कुँवर, दिपेन्द्र मगर र आशिष लामाले समान १ विकेट लिए ।
प्रतियोगिता अन्तर्गत सोमबार समूह चरणको अन्तिम खेलहरु हुदैछ ।

पहिलो खेलमा मकवानपुर क्रिकेट क्लबले रौतहट राइजिङ–११ र दोस्रो खेलमा टिकापुर क्रिकेट क्लबले अन्तर जिल्ला क्रिकेट क्लबसँग खेल्नेछ । मकवनपुरले क्वार्टरफाइनलमा स्थान बनाइसकेको छ भने, रौतहट राइजिङ–११ र अन्तर जिल्ला क्रिकेट क्लबमध्ये एक टोली समूह ‘डी’ बाट क्वार्टरफाइनल प्रवेश गर्नेछन् । प्रतियोगितामा शन्तिनगर युथ क्लब, केसीटीसी, वाई वाई जिएचसिए र त्रिभुवन आर्मीले अन्तिम आठमा स्थान बनाइसकेका छन् ।