भैरहवा (हाम्रो खेलकुद)– तिरुपति क्रिकेट क्लबले प्रथम मेयर कप टि–२० रनिङ क्रिकेट प्रतियोगिताको उपाधि जितेको छ । शनिबार भैरहवास्थित सिद्धार्थ रंगशालामा भएको फाइनलमा लुम्बिनी खुकुरी क्रिकेट क्लबमाथि २ रनको रोमांचक जित निकाल्दै तिरुपति च्याम्पियन बनेको हो ।

तिरुपतिले उपाधिसहित ५० हजार र खुकुरीले २५ हजार रुपैयाँ प्राप्त गर्यो । प्रतियोगितामा बुम एमसिसी क्रिकेट क्लबका विक्रम भुसाल म्यान अफ द सिरिज घोषित भए र उनले १० हजार रुपैयाँ प्राप्त गरे । बुम एमसिसीकै रमेश कुर्मी उत्कृष्ट बलर र खुकुरीका शंकर राना उत्कृष्ट ब्याट्सम्यान घोषित भए । उत्कृष्ट दुवैले समान ५ हजार रुपैयाँ प्राप्त गरे ।

फाइनलमा टस जितेर पहिला ब्याटिङ गरेको तिरुपतिले २० ओभरमा १९. २ ओभरमा सबै विकेट गुमाउँदै १ सय २३ रन बनायो । टोलीका लागि तुलबहादुर थापाले सर्वाधिक २९ रन जोडे । खुकुरीका लालबहादुर अधिकारी र साहव आलमले समान ३ विकेट लिए ।

जवाफमा १ सय २४ रनको लक्ष्य पछ्याउने क्रममा खुकुरीले ९ विकेटको क्षतिमा १ सय २१ रन मात्र बनायो । टोलीका लागि निश्चल चौधरीले ३० रन बनाए । टोलीकाअन्य ब्याट्सम्यानले राम्रो प्रदर्शन गर्न सकेनन् । तिरुपतिका तुलबहादुर थापा र धनबहादुर शाहीले समान २ विकेट लिए । तिरुपतिका तुलबहादुर फाइनल अफ दी म्याच घोषित भए ।

विजेता र उपविजेता खेलाडीहरुलाई रुपन्देही क्षेत्र नं. ३ (१) का प्रदेश सभा सदस्य सन्तोष पाण्डेय, नगरप्रमुख हरिप्रसाद अधिकारी, उपप्रमुख उमा काफ्ले र कार्यक्रम संयोजक चेतबहादुर क्षेत्रीले नगदसहित ट्रफी, पदक र प्रमाणपत्र प्रदान गरे । प्रतियोगितामा सिद्धार्थनगरका ८ क्रिकेट क्लबको सहभागिता थियो ।