धनगढी (हाम्रो खेलकुद) – सर्वाधिक पुरस्कार राशीको क्रिकेट प्रतियोगीता धनगढी प्रिमियर लिग (डीपीएल) को लागि गरिएको ट्यालेन्ट हन्टबाट १२ जना खेलाडी छनौट गरिएको छ ।

डिपीएलमा सुदूरपश्चिमका खेलाडीहरुलाई प्रत्येक टिममा स्थान दिने उदेश्यले आयोजित ट्यालेन्ट हन्टमा सहभागी एक सयभन्दा बढी खेलाडीहरुबाट १२ जना खेलाडीलाई छनौट गरिएको हो । राष्ट्रिय प्रशिक्षक जंगबहादुर थापाले ट्यालेन्ट हन्टमा सहभागी खेलाडीहरुको मुल्यांकन गरेका थिए । यस क्षेत्रका १२ जना खेलाडी छनौट गरिएको हो ।

ट्यालेन्ट हन्टबाट प्रकाश जैशी, नारायण जोशी, सुवोध ऐर, विजय राना, लोकेश बम र विक्रम ठगुन्ना छनौट भएका छन् । त्यस्तै किरन कुमार आग्री, बसन्तसिंह कार्की, शेर मल्ल, पूर्णसिह ठकुरी, प्रकाश सिंह र सागर भण्डारी पनि ट्यान्ट हन्टबाट छनौट हुन सफल भए । ट्यालेन्ट हन्टबाट छनौट भएका १२ जनामध्ये कम्तिमा पनि ६ जना खेलाडीले आउँदो चैत्र १७ गतेबाट धनगढीमा सुरु हुने डीपिएल खेल्न पाउनेछन् ।

छनौट भएका १२ खेलाडीलाई डीपीएलको अक्सनको ‘डी’ समूहमा राखिएको छ । ट्यालेन्ट हन्टसहित अन्य खेलाडीहरु समेटेर आउँदो फागुन ९ गते काठमाडौंमा खेलाडीको अक्सन हुने डिसिएले जनाएको छ । जसबाट प्रत्येक टिमले न्यूनतम २५ हजार देखि अधिकतम ४० हजार रुपैयाँसम्म भाउ लगाउँदै प्रत्येक टिमले कम्तिमा पनि एक खेलाडीलाई अनिवार्य अनुबन्ध गर्नुपर्ने प्रावधान आयोजकले गरेको छ ।

डीपीएलमा देशका विभिन्न ६ टिमहरुले प्रतिस्पर्धा गर्दैछन् । प्रत्येक टोलीले ११ जना खेलाडी अक्सनबाट, एक रणनैतिक खेलाडी, दुई विदेशी तथा एकजना ट्यालेन्ट हन्टबाट खेलाडी लिनुपर्ने व्यवस्था गरिएको छ । डिपिएल चैत १७ गतेबाट वैशाख १ गतेसम्म चल्नेछ । प्रतियोगितामा टिम चौराहा धनगढी, महेन्द्रनगर युनाइटेड, सिवाइसी अत्तरिया, काठमाडौं गोल्डेन्स, रुपेन्देही च्यालेन्जर्स र विराटनगर किंग्सले सहभागिता जनाउँदैछन् ।