काठमाडौं (हाम्रो खेलकुद) – आइसीसी विश्व क्रिकेट लिग डिभिजन २ को तयारीमा रहेको नेपाली राष्ट्रिय टोली आज अभ्यास खेलमा  युएईसँग भिड्दै छ । टस जितेर ब्याटिङ रोजेको नेपालले ४९.३ ओभरमा अलआउट हुँदै २ सय ४६ रनको योगफल तयार पार्न सफल रह्यो ।

नेपालका लागि ओपनर दिलिप नाथले टोलीलाई राम्रो सुरुवात दिलाए पनि मध्यपंक्ति ब्याटिङमा केहि कमजोर देखियो । दिलिपले ६० बलमा  ६१ रनको राम्रो पारी खेलेका थिए । त्यस्तै अर्का ओपनर तथा उपकप्तान ज्ञानेन्द्र मल्ल भने १८ रनमा आउट भएका थिए ।

दिलिपले दोस्रो विकेटका लागि अनिल कुमार शाहसँग मिलेर ६० रनको साझेदारि गरेका थिए । अनिल ५२ बलमा ३१ रन बनाउँदै आउट भएका थिए । कप्तान पारस खड्का २० रन बनाउँदै पभेलियन फर्केका थिए भने आरिफ शेख र दिपेन्द्र ऐरी समान २ रन बनाउँदै आउट भएका थिए ।

नेपालको एक समय ६ विकेटको क्षतिमा १ सय ३६ रन थियो । तर टिममा डेब्यु गरिरहेका रोहित पौडेल र वसन्त रेग्मीले नेपालको पारी उकासेका थिए । वसन्त र रोहित मिलेर सातौं विकेटका लागि ४५ रन जोडेका थिए । वसन्त २१ रनमा आउट भए ।

त्यसपछि क्रिजमा आएका करन केसीले १६ बलमा आक्रामक ३५ रन जोड्दै रोहितको राम्रो साथ दिए । रोहितले राम्रो प्रदर्शन गर्दै अन्तिम ओभरमा आउट हुनुअघि ४३ रन जोड्न सफल भए । आज नेपालले सन्दिप लामिछाने, शरद भेषवाकर र सोमपाल कामीलाई विश्राम दिएको छ ।  अब युएईले केहि बेरमा ब्याटिङ गर्न उत्रिने छ ।