जोहानसबर्ग (एजेन्सी) – दक्षिण अफ्रिका विरुद्धको अन्तिम टेस्टमा भारतले घरेलु टोलीलाई ६३ रनले हराएको छ । भारतले यसअघि नै ३ खेलको सिरिज २-० ले हारिसकेकोले यो जितसँगै सिरिज २-१ बनाउँदै सान्तवना जित हात पारेको छ ।

दोस्रो इनिङ्समा २ सय ४१ रनको लक्ष्य पछ्याएको दक्षिण अफ्रिका १ सय ९४ रनमा अलआउट हुन पुग्यो । भारतका लागि तीव्र गतिका बलर मोहम्मद शमीले ५ विकेट लिए । त्यस्तै जस्प्रित बुम्राह र इशान्त शर्माले २ विकेट तथा भुवनेश्वर कुमारले एक विकेट हात पारेका थिए ।

दक्षिण अफ्रिकाका लागि डिन एल्गर र हासिम अम्लाले राम्रो सुरुवात दिए पनि त्यसलाई अन्य ब्याट्सम्यानले निरन्तरता दिन नसक्दा घरेलु टोलीले सिरिज क्लिन स्विप गर्ने मौका गुमाएको हो । एल्गरले ८६ रन बनाएका थिए भने अम्लाले ५२ रन बनाएका थिए । अन्य ब्याट्सम्यानले भने १० रनभन्दा बढि रन जोड्न सकेनन् ।

यस अघि कप्तान विराट कोहली र चितेश्वर पुजाराको अर्धशतकिय पारीको बावजुद भारत पहिलो इनिङ्समा १ सय ८७ रनमा आउट हुन पुगेको थियो । जवाफमा अम्लाको ६१ रनको मद्दतमा दक्षिण अफ्रिकाले १ सय ९१ रन बनाएको थियो । भारतका लागि पहिलो इनिङ्समा जस्प्रित बुम्राहले ५ विकेट लिएका थिए ।

त्यस्तै अजिक्या राहाने (४८ रन) र कोहली (४१ रन) को पारीको मद्दतले भारतले २ सय ४७ रन जोड्दै २ सय ४१ रनको लक्ष्य दिएको थियो ।भारत र दक्षिण अफ्रिकाले अब एक दिवसीय खेल्ने छन् । पहिलो एक दिवसीय खेल फेब्रुवरी १ म खेलिने छ ।