काठमाडौं (हाम्रो खेलकुद) – विश्व क्रिकेटमा बेग्लै परिचय बनाउन सफल इन्डियन प्रिमियर लिग (आईपीएल) को अक्सनमा यसपटक नेपाली राष्ट्रिय क्रिकेट टोलीका युवा बलर सन्दिप लामिछाने परेका छन्  ।नेपालको क्रिकेट इतिहासमै सन्दिप ईपीएलको अक्सनमा पर्ने पहिलो खेलाडी हुन् ।

भारतका आठ फ्रेन्चाइजले सहभागिता जनाउने यस ट्वान्टी-२० लिगमा सहभागिता जनाउन विश्वका उत्कृष्ट खेलाडीहरुको चाहना हुन्छ । तर अक्सनमार्फत कुनै टोलीले खरिद गरेका खेलाडीले मात्र यसमा सहभागिता जनाउने मौका पाउँछन् । प्रत्यक टोलीले कम्तिमा १८ र बढीमा २७ खेलाडी अक्सनमार्फत किन्न पाउने प्रावधान रहेको छ । प्रत्यक टोलीमा अधिकतम ९ विदेशी खेलाडी राख्न पाइन्छ भने एक पटकमा ४ खेलाडीले मात्र खेल्न पाउँछन् ।

अक्सनमा सहभागी हुन आईपीएलले ५ सय ७८ खेलाडीको अन्तिम नामावाली सार्वजनिक गरेको छ । त्यसमा ३ सय ६० भारतीय तथा २ सय १८ विदेशी खेलाडी रहेका छन् । सबै टोलीलाई अक्सनमा खर्च गर्न ८० करोड भारु तोकिएको छ । केही टोलीले भने प्रतियोगिताको नियमअनुसार पुराना खेलाडी राख्ने प्रक्रिया (रिटेन्सन) को उपयोग गरेकाले केही सिमित बजेट खर्चिन पाउने छैनन् । सन्दिपको न्युनतम सुरुआती मूल्य २० लाख भारु राखिएको छ ।

अक्सन हुने मिति : २७ र २८ जनवरी २०१८

अक्सन हुने स्थान : रिट्ज कार्ल्टन, बेंग्लोर

अक्सन समय : बिहान ९ बजेदेखि

प्रत्यक्ष प्रसारण : स्टार स्पोर्ट्स र हटस्टार एप