सिड्नी (एजेन्सी) – अष्ट्रेलियालाई लगातार तेस्रो एक दिवसीय खेलमा पराजित गर्दै इङ्ल्याण्डले ५ खेलको शृंखला कब्जा गरेको छ । तेस्रो खेल इङ्ल्याण्डले १६ रनले जितेको हो । ३ सय ३ रनको लक्ष्य पछ्याएको अष्ट्रेलियाले निर्धारित ५० ओभरमा ६ विकेट गुमाउँदै २ सय ८६ रन मात्र बनायो ।

टस जितेर अष्ट्रेलियाले इङ्ल्याण्डलाई ब्याटिंग गर्ने निम्तो दिएपछि इङ्ल्याण्डले ५० ओभरमा ६ विकेट गुमाउँदै ३ सय २ रन बनायो । जोस बटलरले ८३ बलको मात्र सामना गर्दै १ सय रन बनाए । ४ छक्का र ६ चौका प्रहार गरेका उनी नट आउट रहे । कप्तान इओन मोर्गानले ४१ रन तथा जोनी बरिस्टोवले ३९ रनको योगदान दिए । अष्ट्रेलियाका जोश हेजलवुडले सर्वाधिक २ विकेट लिए ।

अष्ट्रेलियाका लागि पहिलो दुई खेलमा शतक प्रहार गरेका आरोन फिन्चले तेस्रो खेलमा पनि घरेलु टोलीलाई राम्रो सुरुआत दिलाउँदै ६२ रन बनाए । उनले ५३ बलमा बिष्फोटक ब्याटिंग गर्दै ३ छक्का र ३ चौका प्रहार गरे । मिसेल मार्स (६६ बलमा ५५ रन ) र मार्कस स्टोनिसले (४३ बलमा ५६ रन ) पनि अर्धशतक प्रहार गरे । अष्ट्रेलियालाई अन्तिम २ ओभरमा १५ रनको रेटमा ३० रन चाहिएपनि १३ रन मात्र बनाउँन सक्यो । इङ्ल्याण्डका मार्क वुड , क्रिस वोक्स र अडिल रासिदले समान २ विकेट लिए ।