ब्रिस्बेन (एजेन्सी) – अष्ट्रेलिया विरुद्ध दोस्रो एक दिवसीय क्रिकेटमा ४ विकेटको जित निकाल्दै इङ्ल्यान्डले ५ खेलको शृंखलामा २-० को अग्रता लिएको छ । २ सय ७१ रनको लक्ष्य इङ्ल्यान्डले  ४४.२ ओभरमा मा ६ विकेट गुमाउँदै पुरा गरेको हो । लगातार दुई खेलमा आरोन फिन्चले शतक प्रहार गरेपनि दुवै खेलमा अष्ट्रेलियाले जित्न भने सकेन ।

२ सय ७१ रनको लक्ष्य पछ्याएको इङ्ल्यान्डका ओपनर जेसन रोइ सस्तैमा (२ रन) आउट भएपछि जोनी बैर्स्टोव र एलेक्स हेल्सको १ सय १७ रनको साझेदारीले जितको आधार बनायो । बैर्स्टोव ६० र हेल्स ५७ रन बनाउँदै आउट भएपछि जो रुटले इङ्ल्यान्डको ब्याटिंग सम्हाले । उनले ४६ रन बनाए । उनलाई साथ दिँदै क्रिस वोक्सले २७ बलमा ३९ रन जोड्दै इङ्ल्यान्डको जित सहज बनाए । ४५ औं ओभरको दोस्रो बलमा जित्न १ रन बाँकी हुँदा वोक्सले चौका प्रहार गरेका थिए ।

अष्ट्रेलियाकालागि मिसेल स्टार्चले सर्वाधिक ४ विकेट लिए । आफ्नो व्यक्तिगत अन्तिम ओभरमा आक्रामक बलिङ्ग गर्दै २ विकेट लिएका स्टार्चले अष्ट्रेलियालाई खेलमा फर्काएपनि रुट र वोक्सले इङ्ल्यान्ड जित दिलाए ।

त्यसअघि टस जितेर ब्याटिंग रोजेको अष्ट्रेलियाले फिन्चको शतकीय इनिङ्सको मद्दतले ९ विकेट गुमाउँदै निर्धारित ५० ओभरमा २ सय ७० रन जोडेको थियो । उनले १ सय १४ बलको सामना गर्दै ९ चौका र १ छक्काको मद्दतले १ सय ६ रन बनाएका थिए । त्यस्तै अर्का ओपनर डेभिड वार्नरले ३५ रन जोडे भने मिसेल मार्सले ३६ रन बनाए । इङ्ल्यान्डका अडिल रासिद र जो रुटले २ विकेट लिए भने क्रिस वोक्स , मोइन अली र लिआम प्लम्केटले १ विकेट लिए ।

जनवरी १९ , साँझ ७:५५ मा सच्याइएको