मेलबोर्न (एजेन्सी) – मेलबोर्न क्रिकेट मैदानको कीर्तिमानी लक्ष्य पछ्याएको इङ्ल्याण्डले अष्ट्रेलियालाई ५ विकेटले हराएको छ । १ सय ५१ बलको सामना गर्दै १ सय ८० रन बनाएका जेसन रोय एक दिवसिय क्रिकेटमा सर्वाधिक रन बनाउने इङ्लिस खेलाडी बनेका छन् । जितसंगै पाँच एक दिवसिय शृंखलामा इङ्ल्याण्डले १–० अग्रता लिएको छ ।

३ सय ५ रनको लक्ष्य पाएको इङ्ल्याण्डले ४८ औं ओभरको पाँचौ बलमा मोइन अलीको चौकाको साथ लक्ष्य पुरा गर्यो । इङ्ललण्डको जितमा रोय र जो रुटबीच तेस्रो विकेटका लागि २ सय २१ रनको साझेदारी महत्वपूर्ण रह्यो । ६० रनमा २ विकेट गुमाएको इङ्ल्याण्डकालागि रुटको अवाजित ९१ रनको योगदान रह्यो ।

अष्ट्रेलियाका लागि मिसेल स्टार्चले २ तथा प्याट कमिङ्स र एडम जाम्पाले १ विकेट लिए । इङ्ल्याण्डले टस जितेर बलिङ गर्ने निर्णय गरेपछि आरोन फिन्चको शतकको मद्दतमा ८ विकेट गुमाउँदै अष्ट्रेलियाले निर्धारित ५० ओभरमा ३ सय ४ रन बनाएको थियो ।

फिन्चले १ सय १९ बल खेल्दै १ सय ७ रन बनाए । त्यस्तै मार्कस स्टोनिसले ४० बलमा ६० रनको योगदान दिए भने मिसेल मार्श ६८ बलको सामना गर्दै ५० रन जोडे लगतै आउट भए । इङ्ल्याण्डका लियाम प्लनकेटले सर्वाधिक ३ विकेट लिए भने अदिल रासिदले २ तथा मोइन अली, मार्क वुड र क्रिस वोक्सले १ विकेट लिए ।