काठमाडौं (हाम्रो खेलकुद) – कसमस कलेज र सिवाइएसटीको आयोजनामा इन्डोर क्रिकेटमा सर्वाधिक पुरस्कार राशिको सिक्स ‘ए’ साइड इन्डोर क्रिकेट प्रतियोगिता हुने भएको छ ।

आयोजकले मंगलबार एक कार्यक्रम गर्दै प्रतियोगिता शनिबारदेखि हुने जानकारी गराएको हो । पुस २९ गतेबाट माघ २ गतेसम्म चल्ने प्रतियोगितामा विभिन्न १६ इन्जिनियरिङ कलेजले सहभागिता जनाउनेछन् । सहभागी टोलीलाई चार समूहमा विभाजन गरिनेछ । हरेक समूहका शीर्ष दुई टोली क्वार्टरफाइनलमा प्रवेश गर्नेछन् ।

प्रतियोगिताको विजेताले १ लाख रुपैया प्राप्त गर्नेछ । ‘म्यान अफ दि सिरिज’ले क्रिकेटको फुल किट ब्याग प्राप्त गर्नेछ । प्रतियोगिता कोटेश्वरस्थित अल्टिमेट इन्डोर क्रिकेटमा हुने र खेल इन्डोर क्रिकेटको नियम अनुसार नै खेलाइने आयोजकले जनाएको छ । खेल १२ ओभरको हुनेछ र आउट भएवापत ५ रन घट्नेछ । ६ जना खेलाडी रहने प्रतियोगितामा प्रत्येक खेलाडीले २ ओभर बलिङ गर्नुपर्ने र दुई ब्याट्सम्यानले ४ ओभर ब्याटिङ गर्नु पर्ने हुन्छ ।

यस्तै बेष्ट बलर र ब्याट्सम्यानले समान ३ हजार ५ सय पाउनेछन् । प्रतियोगितामा सहभागी हुने टिमले ३० हजार शुल्क तिर्नुपर्ने हुन्छ । उक्त शुल्कवापत आयोजकले जर्सी, खेल सामग्री, खाना तथा पानी उपलब्ध गराउनेछ । गोल्डेनगेट इन्टरनेसनल कलेज मुख्य प्रायोजक रहेको प्रतियोगिताको लागि बास्ट्रा अनलाइन सप र आइन्स्टाइन एडुकेसनल सेन्टरले सहप्रायोजन गरेको छ ।