काठमाडौं (हाम्रो खेलकुद) – पाँचौँ नेत्रहीन विश्वकप क्रिकेटको ट्रफी आज पाकिस्तानमा सार्वजनिक गरिएको छ । पाकिस्तान र दुबईमा सोमबारदेखि संयुक्त रुपमा सुरु हुने विश्व कपको ट्रफी लाहोरस्थित पर्ल कन्टिनेन्टलमा आयोजित कार्यक्रममा सार्वजनिक गरिएको हो । नेपालका कप्तान कृतन श्रेष्ठ दुवाल, पाकिस्तानका कप्तान निसार अलि, बंगलादेशका कप्तान तान्जिलुर रहमान र विश्व नेत्रहीन क्रिकेट लिमिटेडका पूर्व अध्यक्ष सुल्तान साहलगातले संयुक्त रुपमा विश्वकपको ट्रफी सार्वजनिक गरे ।

यसअघि प्रतियोगितामा भारतले पनि भाग लिने बताइएको थियो । त्यहाँको विदेश मन्त्रालयले पाकिस्तानमा खेल्न अनुमति नदिएपछि भारतले दुबईमा खेल्ने भएको छ । त्यसैले विश्वकप ट्रफी ३ राष्ट्रका कप्तानले मात्र सार्वजनिक गरेका थिए । यससँगै दुबईमा अस्ट्रेलिया, भारत र श्रीलंकाले विश्वकप खेल्नेछन् ।

सो अवसरमा नेपाली टोली का कप्तानले कृतनले आफ्नो टिमले निकै संर्घष गरेर विश्वकप यात्रा तय गरेको स्मण गर्दै विश्वकपमा उत्कृष्ट प्रदर्शन गर्ने लक्ष्य रहेको बताए । उनले भने ‘हामीले सीमित श्रोत साधनका बावजुत राम्रो तयारी गरेका छौँ । आशा छ, त्यही अनुरुप नतिजा पनि लोभ लाग्दो नै रहनेछ ।’

नेपाली टोलीका प्रशिक्षक रिजन प्रजुले भने ‘हामी जित्नकै लागि आएका हौं । हामीले करिब ४ दिनसम्म बसको यात्रा गरेर आएका छौँ । शारीरिक रुपमा हामी निकै थकित भएका छौँ । यद्यपि, जित निकाल्न हामी संघर्षरत छौँ । ४० ओभरको खेल छ, हामीले समालिएर खेल्यौँ भने जित निकाल्ने छौँ ।’

भारतको पाकिस्तान भ्रमण अन्तिम समयमा परिवर्तन भएपछि विश्वकपको खेल तालिका पनि परिवर्तन भएको छ । यसअघि तय भएअनुसार नेपालले पहिलो खेल बंगलादेशसँग ८ जनवरीमा लाहोरमा खेल्ने थियो । तर, तालिका परिवर्तन भएपछि अब नेपालले पहिलो खेल ९ जनवरीमा आयोजक राष्ट्र पाकिस्तानसँग जिन्नाह स्टेडियम गुज्रानवालामा खेल्ने भएको छ ।

दोस्रो खेल १० जनवरीमा बंगलादेशसँग इकबाल स्टेडियमा खेल्नेछ । ११ जनवरीमा भने नेपाल दुबई प्रस्थान गर्नेछ । १३ जनवरीमा दुबईको अजमान ओभल क्रिकेटमा ग्राउन्डमा तेस्रो श्रीलंकासँग प्रतिस्पर्धा गर्नेछ । १४ जनवरीमा नेपालले अजमानकै इडन गार्डेनमा सावित च्याम्पियन भारतसँग खेल्नेछ ।

लिगको अन्तिम खेल नेपालले १५ जनवरीमा अजमानको एमसिसी क्रिकेट ग्राउन्डमा बलियो टोली अस्ट्रेलियाविरुद्ध आफ्नो चुनौती प्रस्तुत गर्नेछ । भारतबाहेकको एसिया राष्ट्र विश्वकपको फाइनलमा पुगेमा फाइनल खेल पाकिस्तानमा हुनेछ । तर,अस्ट्रेलिया अथवा भारत पुगेमा फाइनल खेल दुबईमा हुनेछ । फाइनल खेल १८ जनवरीमा दुबई वा पाकिस्तानको लाहोरमा हुनेछ ।