काठमाडौं (हाम्रो खेलकुद) – भारतको गोरखपुरबाट अमृतसर जाने रेल सेवा अबरुद्ध भएपछि पाकिस्तानमा आयोजना हुने दृष्टिविहिन एक दिवसिय विश्व कप क्रिकेटमा भाग लिन हिडेको नेपाली टोली गोरखपुरबाट बसमा यात्रा गर्ने भएको छ । भारतीय समय अनुसार आज साँझ ७ः२० बजे गोरखपुरबाट अमृतसर जाने रेल अबरुद्ध भएसँगै केहि घन्टा नेपाली टोली अन्यौलमा परेको थियो । २२ सदस्यीय टोली भएपनि रात्रीकालिन बसमा १६ जनाको लागि मात्र टिकट पाउँदा मिलेर जान तयार रहेको टोलीसंगै रहेका खेल पत्रकार अनिल मल्ल ठकुरीले जानकारी दिए। रात्रीकालिन बस १२ बजे दिल्लीतर्फ प्रस्थान गर्नेछ।

नेपाली टोली भोली अमृतसर, बागाबोर्डर हुँदै पाकिस्तानको लाहोर जानेछ । पाँचौ संस्करणको एक दिवसीय दृष्टिविहीन क्रिकेट प्रतियोगिता जनवरी ७ देखि २१ सम्म पाकिस्तान र दुबईमा संयुक्त रुपमा आयोजना हुँदैछ ।

दृष्टिविहीन टि–२० विश्वकपको अनुभव बटुलिसकेको नेपालले पहिलोपटक एकदिवसीय क्रिकेटको विश्वकप खेल्न लागेको हो । प्रतियोगितामा ६ राष्ट्र रहेका छन् । विश्वकपमा साविक विजेता भारत, साविक उपविजेता पाकिस्तान, नेपाल, श्रीलंका, अष्ट्रेलिया र बंगलादेशले प्रतिस्पर्धा गर्नेछन् । वे

स्ट इन्डिज, साउथ अफ्रिका र इङ्ल्यान्डले भने सुरक्षाको कारण देखाउँदै प्रतियोगिता नखेल्ने भएका छन् । राउन्ड रोविन आधारमा हुने प्रतियोगितामा नेपालले जनवरी ८ मा बंगलादेशविरुद्ध खेल्दै प्रतियोगिताको सुरुवात गर्नेछ ।