काठमाडौं (हाम्रो खेलकुद) – विराटनगर वारियर्सले टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगिताको फाइनल खेलमा भैरहवा ग्ल्याडियटर्सलाई जितको लागि १ सय ५० रनको विजयी लक्ष्य दिएको छ । भैरहवाले केही बेरमा ब्याटिङ थाल्नेछ ।

भैरहवा र विराटनगर प्रतियोगितामा तेस्रोपटक प्रतिस्पर्धा गर्दै छन् । दुवै खेलमा विराटनगर विजयी भएको थियो । लिग चरणको खेलमा ३५ रनले पराजित भएको भैरहवा क्वालिफायरको पहिलो खेलमा ८ विकेटले पराजित भएको थियो ।

त्रिवि क्रिकेट मैदानमा शनिबार टस जितेर पहिले ब्याटिङ गरेको विराटनगरले निर्धारित २० ओभरमा ७ विकेट गुमाएर १ सय ४९ रनको मध्यम योगफल तयार गर्‍यो । विराटनगरका लागि अंशुमन रथले सर्वाधिक ४१ रनको योगदान दिए । कप्तान पारस खड्का २७ रनमा हरिशंकर शाहको बलमा भुवन कार्कीद्वारा क्याच आउट भए ।

प्रतियोगिताभर राम्रो प्रदर्शन गरेका हङकङका कप्तान समेत रहेका बाबर हायात ११ रनमा आरिफ शेखको बलमा राहुल यादवबाट क्याच आउट भए । पहिलो विकेटको रुपमा आसिफ शेख ७ रनमा आउट भएका थिए । उनी शरदको बलमा रोहितद्वारा क्याच आउट भए ।

पाँचौं विकेटको लागि अनिल कुमार शाह र प्रनित थापामगरले ३४ रनको साझेदारी गरे । अनिल शाह २२ रनमा आउट भए भने प्रनित थापा मगर १४ रनमा बोल्ड भए । सुमित महर्जन ३ रनमा रन आउटको शिकार भए । त्यस्तै करन केसी ९ तथा बसन्त रेग्मी ३ रनमा नटआउट रहे ।

भैरहवाका लागि हरिशंकर शाह, कृष्ण कार्की र आरिफ शेखले समान २ विकेट लिए । कप्तान शरद भेषावाकर र आरिफ शेखले १ विकेट लिए ।

पुस ३ गतेबाट शुरु भएको प्रतियोगितामा देशभरका ६ टिमले प्रतियोगितामा प्रतिस्पर्धा गरेका थिए । प्रतियोगिताको विजेताले २१ लाख रुपैया प्राप्त गर्नेछन् । खेलको पहिलो इनिङपछि नेपाल आइडलका टप थ्रीले सांगीतिक प्रस्तुती दिएका छन् ।