दोस्रो क्वालिफायर्समा ललितपुर ३ विकेटले पराजित

काठमाडौँ (हाम्रो खेलकुद) – दोस्रो क्वालिफायर खेलमा ललितपुर प्याट्रियट्सलाई ३ विकेटले पराजित गर्दै भैरहवा ग्ल्याडियटर्स टीभिएस एभरेस्ट प्रिमियर लिग (इपीएल) टी–ट्वान्टी क्रिकेट प्रतियोगिताको फाइनलमा प्रवेश गरेको छ ।

भैरहवाले अब उपाधिका लागि शनिबार विराटनगर वारियर्सको सामना गर्नेछ । लिग चरण र क्वालिफायर्सको खेलमा भैरहवा विराटनगरसँग पराजित भएको थियो ।

ललितपुरले दिएको १ सय ३३ रनको लक्ष्य भैरहवाले १९.३ ओभरमा ७ विकेट गुमाएर पूरा गर्यो । भैरहवाको जितमा रोहित कुमार पौडेलले २८ रनको अविजित इनिङ्स खेले । १८.३ बलमा रसिद खानको बलमा कुशल भुर्तेलले रोहित कुमार पौडेललाई क्याच छुटाउनु नै ललितपुरको हारमा कारक बन्यो । उनी रोहितले अन्तिम ओभरको पहिलो र दोस्रो बलमा छक्का प्रहार गरे ।

ओपनर प्रथम सालुङ्के ३२ रनमा सन्दिप लामिछानेको बलमा बोल्ड आउट भए । बोल्ड आउट हुनुअघि प्रथमले लगातार तीन छक्का प्रहार गरेका थिए । भुपेन्द्र थापा १९ रनमा आउट भए । पुनित मेहरा १४ रनमा क्याच आउट भए । राहुल यादव ९ रनमा रन आउटको शिकार भए । कप्तान शरद भेषवाकार ९ रन तथा आरिफ शेख ६ रनमा आउट भए । प्रदिप ऐरी ५ रनमा आउट भए ।

ललितपुरका पवन सर्राफ र ललितनारायण राजवंशीले समान २ विकेट लिए । सन्दिप लामिछाने र रसिद खानले समान १ विकेट लिए ।

टस हारेर पहिले ब्याटिङको निम्तो पाएको ललितपुरले निर्धारित २० ओभरमा ६ विकेट गुमाएर १ सय ३२ रनको सामान्य योगफल बनायो । यि दुई टिमबीचको विजेताले शनिबार हुने फाइनलमा बिराटनगर वारियर्ससँग प्रतिस्पर्धा गर्नेछ । ललितपुरका लागि जयकिसन कोल्सावालाले सर्वाधिक ४२ रनको योगदान दिए । अर्का ओपनर शंखर राना १२ रनमा रन आउट भए ।

कोल्सावाला र शंकर रानाले पहिलो विकेटको लागि ५१ रनको साझेदारी गरे । राम्रो शुरुवात गरेको ललितपुरले ६० रनमा महत्वपूर्ण २ विकेट गुमाउन पुग्यो । ललितपुरका कप्तान ज्ञानेन्द्र मल्ल २०, सन्नी पटेल २४ र कुशल भुर्तेल शुन्य रनमै आउट भए । कप्तान मल्ल आरिफ शेखको बलमा क्याच आउट भए । सोनु तामांङ १० रनमा नटआउट रहे भने अन्तिम बलमा आउट भएका दिपेश भण्डारीले ९ बलमा २२ रन प्रहार गरेका थिए ।

भैरहवाका पुनित मेहेराले ४ ओभरमा २८ रन खर्चदै २ विकेट लिन सफल भए । हरिशंखर शाह, आरिफ शेख र भुवन कार्कीले समान १-१ विकेट लिए ।

राउण्ड रोविन लिगको आधारमा गत पुस ३ गतेबाट शुरु भएको प्रतियोगितामा विभिन्न ६ शहरका ६ टिमले प्रतिस्पर्धा गरेका थिए । प्रतियोगिताको विजेताले २१ लख रुपैया प्राप्त गर्नेछ । फाइनल शनिबार हुने छ ।

राेहित खेलका म्यान अफ दि म्याच भए ।