काठमाडौँ (हाम्रो खेलकुद)- ललितपुर प्याट्रियट्सले टीभिएस एभरेस्ट प्रिमियर लिग (इपीएल) टी–ट्वान्टी क्रिकेट प्रतियोगिताको इलिमेटरको पहिलो खेलमा पोखरा राइनोजलाई जितको लागि १ सय ३९ रनको विजयी लक्ष्य दिएको छ ।

टस हारेर पहिले ब्याटिङको निम्तो पाएको ललितपुरले निर्धारित २० ओभरमा ५ विकेट गुमाएर १ सय ३८ रनको सामान्य योगफल बनायो । पोखराले केहीबेरमा जवाफी ब्याटिङ थाल्नेछ । यि दुई टिमबीचको विजेताले भोलि भैरहवा ग्लाडियटर्ससँग फाइनल प्रवेशका लागि प्रतिस्पर्धा गर्नेछ । ललितपुरका लागि शंकर रानाले सर्वाधिक ३५ रनको योगदान दिए । अर्का ओपनर जयकिसन कोल्सावाला २८ रनमा आउट भए ।

कोल्सावाला र शंकर रानाले पहिलो विकेटको लागि ६० रनको साझेदारी गरे । राम्रो शुरुवात गरेको ललितपुरले ७६ रनमा महत्वपूर्ण ४ विकेट गुमाउन पुग्यो । यसबीचमा ललितपुरका कप्तान ज्ञानेन्द्र मल्ल २, कुशल भुर्तेल ८ र सोनु तामाङ शुन्य रनमै आउट भए । कप्तान मल्ल सुसन भारीको बलमा एलबिडब्लुको शिकार भए । सन्नी पटेल ३९ रनमा तथा दिपेश भण्डारी १९ रनमा नटआउट रहे । दिपेश र सन्नीले छैटौ विकेटको लागि ६२ रनको साझेदारी गरे ।

पोखराका इसरार उल्लाहले ४ ओभरमा १४ रन खर्चदै ३ विकेट लिन सफल भए । सुसन भारीले २ विकेट लिए । राउण्ड रोविन लिगको आधारमा गत पुस ३ गतेबाट शुरु भएको प्रतियोगितामा विभिन्न ६ शहरका ६ टिमले प्रतिस्पर्धा गरेका थिए । प्रतियोगिताको विजेताले २१ लख रुपैया प्राप्त गर्नेछ ।