काठमाडौं  (हाम्रो खेलकुद) – पोखरा राइनोजले राजधानीमा जारी टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा जितका लागि ललितपुर प्याट्रियट्सलाई १ सय ३३ रनको विजयी लक्ष्य दिएको छ ।

त्रिवि क्रिकेट मैदान कीर्तिपुरमा टस हारेर पहिले ब्याटिङ गरेको पोखराले निर्धारित २० ओभरमा ५ विकेट गुमाएर १ सय ३२ रनको मध्यम योगफल बनायो ।

पोखराका लागि ओपनर सुनिल धमलाले ७० रनको अविजित योगदान दिए । ६२ बल खेलेका सुनिलले २ चौका र ५ छक्का प्रहार गरे । सुनिल प्रतियोगितामा तेस्रो अर्धशतक बनाउने नेपाली खेलाडी बने । यसअघि पवन सर्राफ र दिपेन्द्रसिंह ऐरीले अर्धशतक पुरा गरेका थिए । अहिलेसम्म प्रतियोगितामा ११ अर्धशतक भएका छन् । त्यसमध्ये आठ अर्धशतक विदेशी खेलाडीको नाममा छ ।

राजेश पुलामी मगरले ३२ रन बनाए । चौथो सुनिल र राजेशले तेस्रो विकेटको लागि ६६ रनको साझेदारी गरे । छैटौ नम्वरमा ब्याटिङमा आएका विनोद भण्डारी १२ रनमा आउट भए । इसरार उल्लाह ३ तथा आसिफ अली २ रनमा पभेलियन फर्किए ।

ललितपुरका दिपेश भण्डारी, रसिद खान, ललित नारायण राजवंशी र सन्दिप लामिछानेले समान १ विकेट लिए । ललितपुरले केही बेरमा ब्याटिङ थाल्नेछ । ललितपुरले जित हात पारे प्ले अफमा पुग्नेछ भने, पोखरा यसअघि नै प्ले अफमा पुगिसकेको छ । यि दुई टोलीले नै बुधबार प्ले अफ खेल्नेछ ।