काठमाडौं (हाम्रो खेलकुद) – टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा विराटनगर वारियर्सले काठमाडौं किङ्स इलेभेनलाई जितको लागि १ सय ४८ रनको लक्ष्य दिएको छ ।

त्रिवि क्रिकेट मैदान कीर्तिपुरमा टस हारेर पहिले ब्याटिङको निम्तो पाएको विराटनगरले निर्धारित २० ओभरमा ७ विकेट गुमाएर १ सय ४७ रनको योगफल तयार गर्‍यो ।

विराटनगरका लागि बाबर हायातले सर्वधिक ६७ रनको योगदान दिए । अंशुमन रथ ३२ रनमा आउट भए भने कप्तान पारस खड्का २६ रनमा आउट भए । त्यस्तै अनिल शाह ९ रन र करण केसी ५ रनमा आउट भए ।

ओपनर आशिफ शेख शुन्य रनमा आउट भएका थिए । जितेन्द्र मुखियाको बलमा ६२ रनमा बाबर हायातको क्याच अक्षु फर्नान्डोले छुटाएका पनि थिए ।

काठमाडौंका सोमपाल कामी र अमरसिंह राउटेलाले समान २ विकेट लिए । कप्तान फरवेज महारुफ र जितेन्द्र मुखियाले एकएक विकेट लिए । यस खेलमा जित हात पारे लिग चरणमा विराटनगर अपराजित रहँदै प्ले अफमा पुग्नेछ ।

काठमाडौंले जित हात पारे आफ्नो प्ले अफमा पुग्ने सम्भावना यथावत राख्नेछ । काठमाडौं पराजित भएको खण्डमा लिग प्ले अफ पुग्नका लागि अन्य खेलको नतिजा कुर्नुपर्ने हुन्छ । लिगमा विराटनगर ४ खेलबाट ८ अंकसहित शीर्ष स्थानमा छ भने २ अंकसहित काठमाडौं पाँचौ स्थानमा छ ।