काठमाडौं (हाम्रो खेलकुद) – चितवन टाइगर्सले टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा पहिलो जित दर्ता गरेको छ ।

प्रतियोगिता अन्तर्गत शनिबार भएको खेलमा ललितपुर प्याट्रियट्सलाई ५ विकेटले पराजित गर्दै चितवनले प्रतियोगितामा पहिलो जित निकालेको हो । यसअघिका तीन खेलमा चितवन पराजित भएको थियो ।

ललितपुरले दिएको १ सय ३१ रनको लक्ष्य चितवन टाइगर्सले १९.२ ओभरमा ५ विकेट गुमाएर पुरा गर्‍यो । चितवनको जितमा प्रविन गुप्ताले ५६ रनको अविजित अर्धशतकीय इनिङ्स खेले । कप्तान दीपेन्द्रसिंह ऐरीले ५५ रनको योेगदान दिए । आकाश थापा ४ रनमा नटआउट रहे । अन्य ब्याट्सम्यानले दोहोरो अंक जोेड्न सकेनन् ।

ललितपुरका सन्नी पटेलले ३ विकेट लिए । ललित नारायण राजवंशी र सन्दिप लामिछानेले समान १ विकेट लिए । यसअघि त्रिवि क्रिकेट मैदानमा टस जितेर पहिले ब्याटिङ गरेको ललितपुरले निर्धारित २० ओभरमा सबै विकेट गुमाएर १ सय ३० रनको मध्य योगफल बनाएको हो ।

ललितपुरका लागि ओपनर जयकिसन कोल्सावालाले ३१ रनको योगदान दिए । शंकर राना २७ रनमा आउट भए । आक्रमक खेल खेलेका सुवोध भाटी २३ रनमा आउट भए । भाटीले ८ बलमा ३ छक्का प्रहार गरेका थिए । जयकिसान कोल्सावाला र शंकर रानाले पहिलो विकेटको लागि ५८ रनको साझेदारी गरेका थिए ।

सोनु तामाङ १९ रनमा आउट भए । कप्तान ज्ञानेन्द्र मल्ल १० रनमा आउट भए । सन्नी पटेल ३ तथा मेहबुव आलम र कुशल भुर्तेल समान १ रनमा आउट भए । रसिद खान शुन्य रनमा आउट भए । चितवनका योगेन्द्रसिंह कार्कीले ४ विकेट लिए । प्रमेश कुमार र प्रविन गुप्ताले समान २ विकेट तथा कमलसिंह ऐरीले १ विकेट लिए ।

प्रतियोगिता अन्तर्गत आइतबार कुनै खेल हुने छैन । सोमबार काठमाडौं किङ्स इलाभेनले विराटनगर वारियर्ससँग खेल्नेछ । अर्काे खेलमा पोखरा राइनोज र भैरहवा ग्लाडियटर्सबीच खेल हुनेछ ।