काठमाडौं (हाम्रो खेलकुद) – विराटनगर वारियर्सले टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा लगातार चौथो जित दर्ता गरेको छ ।

यसअघि नै इपीएलको प्लेअफ चरणमा पुगिसकेको विराटनगरले शनिबार भैरहवा ग्लाडियटर्सलाई ३५ रनले पराजित गर्दै प्रतियोगितामा अपराजित रहन सफल भएको हो । भैरहवाको भने प्रतियोगितामा यो पहिलो हार हो ।विराटनगरले दिएको १ सय ५० रनको लक्ष्य पछ्याएको भैरहवाले १८.३ ओभरमा सबै विकेट गुमाएर १ सय १४ रन मात्र बनाउन सक्यो ।

भैरहवाका प्रदिप ऐरी र हरिशंकर शाहले समान १८ रन बनाए । त्यस्तै पुनित विष्ट १४ र कृष्ण कार्की १२ रनमा आउट भए । भुवन कार्की ७ तथा प्रथम सालुङ्के र पुनित मेहरा समान ६ रनमा आउट भएका थिए । कप्तान शरद भेषवाकर आज २ रनमा आउट भए । भैरहवालाई कम स्कोरमा समेट्न विराटनगरका अविनास कर्ण एक्लैले ४ विकेट लिए । वसन्त रेग्मीले ३ विकेट लिए भने शाहन आदेशा, पारस खड्काले १-१ विकेट लिए ।

यसअघि त्रिवि क्रिकेट मैदान कीर्तिपुरमा टस हारेर पहिले ब्याटिङ गरेको विराटनगरले अंशुमान रथको अर्धशतकको मद्दतमा ६ विकेट गुमाएर १ सय ४९ रन बनाएको थियो । राम्रो शुरुवात गरेको विराटनगरको मध्यक्रममले भने राम्रो खेल्न सकेन । विराटनगरका लागि अंशुमन रथले सर्वाधिक ५७ रनको अर्धशतकीय इनिङ्स खेले । ५० बल खेलेका अंशुमनले आफ्नो पारीमा ८ चौका हिर्काए । अंशुमनको यो प्रतियोगितामा दोस्रो अर्धशतक हो । पहिलो खेलमा पोखरा राइनोजसँगको खेलमा उनले ६० रन बनाएका थिए ।

बाबर हायतले ३६ रनको योगदान दिए । ३५ रनमा पुनित मेहराको बलमा प्रथम सालुङ्केले क्याच छुटाए पनि १६ औं ओभरको पहिलो बलमा हरिशंकर शाहबाट ३६ रनमा बोल्डआउट भएका थिए । ओपनर आसिफ शेखलाई १ रनमै गुमाएको विराटनगरले दोस्रो विकेटको लागि ९३ रनको साझेदारी गरेको थियो ।

कप्तान पारस खड्का १५ रनमा आरिफ शेखको बलमा भुवन कार्कीबाट क्याचआउट भएका थिए । प्रनित थापामगर १४ रनमा आउट भए भने करन केसी ११ तथा पुष्प थापा २ रनमा नटआउट रहे । भैरहवाका हरिशंकर शाहले ३ तथा आरिफ शेखले २ विकेट लिए । दिपेश श्रेष्ठले १ विकेट लिएका थिए । दोस्रो खेलमा ललितपुर प्याट्रियट्स र चितवन टाइगर्सबीच खेल हुदैछ ।