काठमाडौं (हाम्रो खेलकुद) – अंशुमान रथको अर्धशतक मद्दतमा विराटनगर वारियर्सले टीभिएस एभरेष्ट प्रिमियर लिग (इपीएल) टी–ट्वान्टी क्रिकेट प्रतियोगितामा भैरहवा ग्लाडियटर्सलाई १ सय ५० रनको विजयी लक्ष्य दिएको छ ।

त्रिवि क्रिकेट मैदान कीर्तिपुरमा टस हारेर पहिले ब्याटिङ गरेको विराटनगरले निर्धारित २० ओभरमा ६ विकेट गुमाएर १ सय ४९ रनको योगफल तयार पारेको हो । राम्रो शुरुवात गरेको विराटनगरले मध्यक्रममले राम्रो खेल्न सकेन ।

विराटनगरका लागि अंशुमन रथले सर्वाधिक ५७ रनको अर्धशतकीय इनिङ्स खेले । ५० बल खेलेका अंशुमनले ८ चौका प्रहार गरे  । बाबार हायतले ३६ रनको योगदान दिए । ३५ रनमा पुनित मेहराको बलमा प्रथम सालुङ्केले क्याच छुटाएपनि १६ औं ओभरको पहिलो बलमा हरिशंकर शाहबाट ३६ रनमा बोल्डआउट भए ।

ओपनर आसिफ शेखलाई १ रनमै गुमाएको विराटनगरले दोस्रो विकेटको लागि ९३ रनको साझेदारी गरे । कप्तान पारस खड्का १५ रनमा आरिफ शेखको बलमा भुवन कार्कीबाट क्याचआउट भए । प्रनित थापामगर १४ रनमा आउट भए । करन केसी ११ तथा पुष्प थापा २ रनमा नटआउट रहे ।

भैरहवाका हरिशंकर शाहले ३ तथा आरिफ शेखले २ विकेट लिए । दिपेश श्रेष्ठले १ विकेट लिए । भैरहवाले केहीबेरमा ब्याटिङ थाल्नेछ । दुवै टोली प्रतियोगितामा अपराजित छन् ।