काठमाडौं (हाम्रो खेलकुद) – एभरेष्ट प्रिमियर लिग (इपिएल) टी–ट्वान्टी क्रिकेट प्रतियोगितामा पोखरा राइनोजले १० विकेटको शानदार जित निकालेको छ । चितवन टाइगर्सले दिएको १ सय १४ रनको लक्ष्य पोखरा राइनोजले विना विकेट ओभरमा पुरा गर्यो ।

तस्बिर : विवेक सुवेदी / हाम्रो खेलकुद

पोखराको शानदार जितमा ओपनर सुनिल धमला र इसरुल्लाहले अविजित इनिङ्स खेले । उनीहरुले पहिलो विकेटको लागि १ सय १६ रनको साझेदारी गरे । इसरुल्लाहले सर्वाधिक ६१ रनको नटआउट अर्धशतकीय योगदान दिए । उनले ५२ बलको सामना गर्दै ६ छक्का र १ चौका प्रहार गर्दै ६१ रन बनाए । यस्तै सुनिल धमलाले ३ चौका र २ छक्काको मद्दतमा ४६ रनमा नटआउट रहे । इसरुल्लाह नै प्रतियोगितामा अर्धशतक बनाउने पहिलो खेलाडी बने ।

यसअघि कीर्तिपुरस्थित त्रिवि क्रिकेट मैदानमा मंगलबार टस हारेर पहिले ब्याटिङ गरेको चितवनले पुरै २० ओभर खेल्दै ९ विकेट गुमाएर १ सय १३ रनको मध्यम स्कोर बनाएको हो । चितवनका लागि कप्तान दीपेन्द्रसिंह ऐरीले सर्वाधिक ४२ रन बनाए । ३२ बल खेलेका कप्तान ऐरीले ६ चौका र १ छक्का प्रहार गरे । दीपेन्द्र इसरुल्लाहको बलमा सुनिल धमलाबाट क्याच आउट भए । अनिल मण्डल ३२ रनमा इसरुल्लाहबाट कट एण्ड बोल्ड भए । भीम सार्की ८, योगेन्द्रसिंक कार्की ७, सुनाम गौतम ७ रनमा आउट भए । ओपनर दीलिपनाथ ६ रनमा आउट भए । सवेज खान र ललित भण्डारीले खाता खोल्न सकेनन् ।

पोखरा राइनोजका इसरुल्लाहले सर्वाधिक ४ विकेट लिए । पाकिस्तानी इसरुल्लाहले ४ ओभर बलिङ गर्दै २२ रन खर्चदै महत्वपूर्ण ४ विकेट लिए । ताज वालीले ३ विकेट लिए । ताज वालीले २१ रन खर्चदै ३ विकेट लिएका हुन् । कप्तान शक्ति गौचन र विक्रम सोबले समान १ विकेट लिए ।

प्रतियोगिताको दोस्रो खेलमा विराटनगर वारियर्सले ललितपुर प्याट्रियट्ससँग प्रतिस्पर्धा गर्नेछ । ललितपुरले सोमबार काठमाडौं किङ्स इलाभेनलाई ७ विकेटले पराजित गरेको थियो ।