काठमाडौं (हाम्रो खेलकुद) – एभरेष्ट प्रिमियर लिग (इपिएल) को टोली विराटनगर वारियर्सले टिमको कप्तानमा राष्ट्रिय टिमका कप्तान पारस खड्कालाई नियुक्त गर्दै टिमको घोषणा गरेको छ ।

विराटनगर वारियर्सले आइतबार राजधानीमा पत्रकार सम्मेलनको आयोजना गर्दै पारसको कप्तानीम उप–कप्तान वसन्त रेग्मी र हङकङका तीन खेलाडी अन्सुमान रथसहित १५ सदस्यीय टिमको घोषणा गरेको हो ।

पारस र वसन्तसँगै टोलीमा अन्सुमान रथ, करण केसी, अविनाश कर्ण, आसिफ सेख, रामनरेश गिरी, पुष्प थापा, अनिलकुमार शाह, सुमित महर्जन, प्रनित थापामगर, आकास विष्ट छन् । हङकङका कप्तान बबर हायात सोमबार टिममा समावेश हुने क्लबले जनाएको छ । टोलीको प्रायोजकमा एनआइसी एशिया बैंक, स्निकर्स र हाईलाइफ फुटवयरले रहेका छन् ।

नेपालको क्रिकेट तथा खेलकुदको विकासका साथै नवप्रतिभालाई प्रोत्साहन र समर्थन गर्न विराटनगरका स्थानिय उद्योगी तथा प्रतिष्ठित व्यवसायीद्धारा बिराटनगर वारियर्स प्रवर्धन गरिएको छ । उत्कृष्ट प्रदर्शनका साथ उपाधि जित्नेमा आफुहरु आशावादी रहेको पारसले बताएका छन् । ६ टोलीको सहभागिता इपिएल सोमबार कीर्तिपुरस्थित त्रिवि मैदानमा सुरु हुनेछ ।