विशाखापट्नम (एजेन्सी)– श्रीलंकाले तीन एक दिवसिय अन्तर्राष्ट्रिय क्रिकेट श्रृंखलाको अन्तिम तथा निर्णायक खेलमा भारतलाई २ सय १६ रनको लक्ष्य प्रस्तुत गरेको छ । भारतले टस जितेर श्रीलंकालाई पहिले ब्याटिङको निमन्त्रणा दिएको थियो । श्रीलंकाले उत्कृष्ट सुरुआत गरेपनि अन्तिमसम्म उच्च प्रदर्शनलाई निरन्तरता दिन सकेन ।

श्रीलंकाले ४४.५ ओभरमा सबै विकेट गुमाएर २ सय १५ रन जोड्यो । ओपनर उपुल थारगांको अर्धशतक पुरा गरेको खेलमा साडिरा सामाराविक्रमाले ४२, एन्जेलो म्याथुज र एसेला गुनारत्ने समान १७ र दानुस्का गुनातिलाका १३ रन बनाएका थिए । अन्य ब्याट्सम्यानले भने दोहोरो अंकमा रन बनाउन सकेनन् ।

थारगां शतक बनाउन ५ रनले चुकेका थिए । ८२ बल खेल्दै उनले १२ चौका र ३ छक्काको मद्दतमा ८२ रन बनाएका थिए । एक समय २ विकेटको क्षेतिमा १ सय ३६ रन बनाएको श्रीलंकाले बाँकी ८ विकेट गुमाउँदा ७९ रनमात्र जोड्न सक्यो । घरेलु टोलीका लागि कुलदीप यादव र युजभेन्द्र चाहालले समान ३, हार्दिक पाण्डेयले २ तथा भूवनेश्वर कुमार र जसप्रित बुम्रराहले समान १ विकेट लिएका थिए ।

पहिलो खेलमा श्रीलंका विजयी भएपनि दोस्रो खेलमा कार्यवहाक कप्तान रोहित शर्माको कीर्तिमानी दोहोरोका साथ खेल जित्दै खेलमा १–१ को बराबरी गरेको थियो । पहिलो खेल श्रीलंकाले ७ विकेटले र दोस्रो खेल भारतले १ सय ४१ रनले जितेको थियो ।

यद्दपी यो वर्ष श्रीलंकाको प्रदर्शन निकै कमजोर रहेको छ । २८ एक दिवसयमा २२ हारेको श्रीलंकाले दक्षिण अफ्रिका, पाकिस्तान र भारतसँगको श्रृखंला समान ५–० ले गुमाएको थियो । एक दिवसिय पछि यी दुई टोलीबीच तीन वटा टि ट्वान्टी खेल हुनेछ ।