काठमाडौं (हाम्रो खेलकुद) – नेपाल एसीसी यू–१६ इस्टर्न रिजन क्रिकेटको च्याम्पियन बनेको छ । थाइल्यान्डमा आज सम्पन्न फाइनलमा सिंगापुरलाई ७१ रनले हराउँदै नेपालले उपाधि जितेको हो । नेपाल अपराजित रहँदै च्याम्पियन बन्न सफल भएको छ । १ सय ८४ रनको लक्ष्य पछ्याएको सिंगापुरलाई नेपाली बलरले ३१.५ ओभरमा अलआउट गर्दै १ सय १२ रनमा रोकेको थियो ।

 

सिंगापुरलाई लक्ष्यमा पुग्नबाट रोक्न सूर्य तामाङ र अजयकुमार लोनियाले उत्कृष्ट बलिङ गरे । दुवैले समान ३ विकेट लिए । सूर्यले ७ ओभरमा १ मेडनसहित २० रन खर्चदा अजयले ५ ओभरमा १६ रन दिए । नारायण जोशी र कुशल मल्ले समान १ विकेट लिए । सिंगापुरका लागि साइ हर्ष भेनुगोपालले सर्वाधिक ३१ रन बनाए । अरुण वाड्वाले २१, राउल शर्माले १५ र सान सावन्नेले १२ रन जोडे भने अन्य कुनै पनि ब्याट्सम्यानले दोहोरो अंकमा रन बनाउन सकेनन् ।

बैंककको ट्रेड थाइ क्रिकेट मैदानमा टस जितेर पहिले ब्याटिङ गरेको नेपालले निर्धारित ३५ ओभरमा ६ विकेट गुमाएर १ सय ८३ रन बनाएको छ । नेपालका लागि विशाल बिक्रम केसीले अर्धशतक पुरा गरे । ७९ बलको सामना गरेका विशालले ४ चौका र १ छक्काका साथ ६३ रन बताए । नियमित कप्तान रित गौतम आजको खेलमा टोलीमा समावेश नभएपछि विशालले नै कप्तानी सम्हालेका छन् ।

 

चौंथो नम्बरमा ब्याटिङ गरेका विशालले छैठौं विकेटका लागि नारायण जोशीसँग मिलेर ३३ बलमा ४८ रनको साझेदारी गरे । त्यसअघि विशालले पाँचौ विकेटका लागि सुनिल भण्डारीसँग ६९ बलमा ४२ रनको साझेदारी निभाए । नारायण ४६ रनमा अविजित रहे । २३ बलको सामना गरेका नारायणले ५ चौका र १ छक्का प्रहार गरेका थिए ।

सुवास ऐर २२, तृतराज दास १९, सुनिल भण्डारी १५ रन बनाएर आउट भए भने प्रतिश जिसी १० रनमा अविजित रहे । कुशल मल्लले खाता खोल्न सकेनन् भने राजन मगर ३ रन जोडे । सिंगापुरका इसान सनेले २ विकेट लिए । यसअघि नेपाल एसीसी यू १९ इस्टर्न रिजन च्याम्पियन बनेको थियो ।