विशाखापट्नम (एजेन्सी)– भारत र श्रीलंकाबीचको तीन एक दिवसिय अन्तर्राष्ट्रिय क्रिकेट श्रृंखलाको अन्तिम तथा निर्णायक खेल आज हुँदैछ । पहिलो खेलमा श्रीलंका विजयी भएपनि दोस्रो खेलमा कार्यवहाक कप्तान रोहित शर्माको कीर्तिमानी दोहोरोका साथ खेल जित्दै खेलमा १–१ को बराबरी गरेको थियो ।

भारतीय कार्यवहाक कप्तान रोहित शर्मा (बायाँ) र पूर्व कप्तान महेन्द्रसिंह धोनी प्रशिक्षणका दौरान ।

अघिल्ला दुई खेलमा लयमा देखिएका एन्जलो म्याथुज श्रीलंकाका लागि महत्वपूर्ण खेलाडीका रुपमा हेरिएको छ । पहिलो खेलमा अविजित २५ र दोस्रोमा अविजित १ सय ११ रन बनाएका म्याथुजले आजको खेलमा पनि महत्वपूर्ण भूमिका निर्वाह गर्ने अपेक्षा गरिएको छ ।

खेलको अघिल्लो दिन शनिबार श्रीलंकाका कप्तान थिसारा परेराले जितको अपेक्षा राखेका छन् । हामी केही विशेष गर्नेमा आशावादी छौं , उनले भने, किनकी यहाँ र हाम्रो देशको मौसम पनि मिल्दो जुल्दो छ । दोस्रो खेलमा हामीले योजना अनुसारको बलिङ गर्न सकेनौं । तर, आज बलरहरुले उच्च प्रदर्शन गर्ने अपेक्षा राखेका छौं ।

पहिलो खेल श्रीलंकाले ७ विकेटले र दोस्रो खेल भारतले १ सय ४१ रनले जितेको थियो । यद्दपी यो वर्ष श्रीलंकाको प्रदर्शन निकै कमजोर रहेको छ । २८ एक दिवसयमा २२ हारेको श्रीलंकाले दक्षिण अफ्रिका, पाकिस्तान र भारतसँगको श्रृखंला समान ५–० ले गुमाएको थियो । एक दिवसिय पछि यी दुई टोलीबीच तीन वटा टि ट्वान्टी खेल हुनेछ ।