काठमाडौं (हाम्रो खेलकुद) – नेपालले थाइल्यान्डमा जारी एसीसी यु १६ इस्टर्न रिजन क्रिकेट प्रतियोगिताको सेमिफाइनलमा मलेसियालाई १ सय २८ रनको लक्ष्य दिएको छ । टेर्ड थाई मैदानमा जारी खेलमा वर्षाको कारण खेल ढिला सुरु भएपछि १ ओभर खेल घटाइएको छ । टस हारेर ब्याटिङको निम्तो पाएको नेपालले ८ विकेटको नोक्सानीमा १ सय २७ रन बनाएको थियो ।

दबाबकाबीच नेपालले ६७ रन बनाउँदा ५ विकेट गुमाएको थियो । तल्लो क्रमका ब्याट्सम्यानले मोर्चा सम्हालेपछि नेपालले मध्यम स्कोर खडा गरेको थियो । आठौं नम्बरमा ब्याटिङ गरेका प्रतिश जिसीले टोलीका लागि सर्वाधिक २५ रन जोडे । उनले २२ बलमा १ छक्का र १ चौका प्रहार गरे । नारायण जोशी र सुनिल भण्डारीले समान १७ रन बटुले ।

ओपनर कुशल मल्ल ६ र राजन मगर ११ रन बनाए । त्यसपछि ब्याटिङ गर्न पुगेका विक्रम केसीले १५ रन जाडे । म्यानमार विरुद्ध शतक पुरा गरेका कप्तान रित गौतमले ११ रन मात्र बनाए । त्रितराज दासले १३ रन थले । मलेसियाको लागि मोहम्मद अफिकले सबैभन्दा बढी ३, असलम खानले २ विकेट लिए ।

समूह चरणका सबै ३ खेल जितेको नेपाल समूह एको विजेता र मलेसिया समूह बीको उपविजेताका रुपमा अन्तिम चारमा पुगेका छन् । नेपालले समूह चरणको अन्तिम खेलमा म्यानमारलाई ३ सय ३७ रनले हराउनुअघि थाइल्यान्डलाई १ सय ३३ र हङकङलाई ४ विकेटले हराएको थियो ।

मलेसियाले समूह चरणका ३ मध्ये २ खेलमा जित र अर्कोमा हार बेहोरेको थियो । पहिलो खेलमा सिंगापुरसँग २९ रनले पराजित मलेसियाले त्यसपछिका दुई खेलमा चीनलाई ४ विकेट र भुटानलाई १ सय ७१ रनले हराएको थियो ।