काठमाडौं (हाम्रो खेलकुद) – जारी आइसिसी विश्व क्रिकेट लिग च्याम्पियनसिपको खेलमा संयुक्त अरब इमिरेट्स (युएई)ले नेपाललाई १ सय ९६ रनको लक्ष्य दिएको छ । टस हारेर पहिले ब्याटिङको निम्तो पाएको युएईले ४९.२ ओभरमा अल-आउट हुँदै १ सय ९५ रन बनाएको हो ।

युएईका लागि मिडल-अर्डरका ब्याट्सम्यान अद्नान मुफ्तिले ८९ बल खेल्दै १ सय ४ रन जोडे । उनको शतकीय पारीमा ८ चौका र ३ छक्का पनि सामेल थियो । त्यस्तै मोहम्मद बुताले ७२ बलमा ३७ रन बनाए भने अन्य युएईका ब्याट्सम्यानले प्रभावकारी ब्याटिङ गर्न सकेनन् ।

युएईलाई सस्तैमा रोक्न सोमपाल कामीले ५ विकेट लिए । सोमपालले १० ओभरमा केवल २७ रन खर्चिँदै निकै राम्रो बलिङ गरेका थिए । त्यस्तै ललित भण्डारी, पारस खड्का, सागर पुन र सन्दिप लामिछानले एकएक विकेट हात पारे ।

नेपाल र युएई यसअघि नै डिभिजन २ मा घटुवा भइसकेका छन् । अब विश्व कपमा छनोट हुने नेपालको सम्भावनाका लागि एउटा मात्र विकल्प रहेको छ । जसका लागि नेपालले फेब्रुअरीमा डिभिजन २ खेल्नेछ ।

नामिवियामा हुने डिभिजन टुमा नेपालसहित युएई, नामिबिया, केन्या, ओमन र क्यानाडाले प्रतिस्पर्धा गर्नेछ । यी ६ वटा टिम मध्ये शीर्ष दुई मा पर्ने टिम विश्वकप छनोटमा प्रवेश गर्नेछन् ।