काठमाडौं (हाम्रो खेलकुद) – नेपालले आइसिसी विश्व क्रिकेट लिग च्याम्पियनसिप अन्तर्गतको संयुक्त अरब इमिरेट्ससँगका अन्तिम खेल आज खेल्दैछ । नेपाल र युएईबीचको खेल शिख जायद क्रिकेट मैदानमा नेपाली समय अनुसार बिहान ११ः१५ बजे सुरु हुनेछ ।

तस्विर: रमन सिवाकोटी (टेक्निकल एनलिस्ट, नेपाल क्रिकेट टिम)

नेपालले राम्रो प्रदर्शन गरे पनि पहिलो खेल ७ विकेटले गुमाएको थियो । नेपाल र युएई यसअघि नै डिभिजन २ मा घटुवा भइसकेका छन् ।

अब विश्व कपमा छनोट हुने नेपालको सम्भावनाका लागि एउटा मात्र विकल्प रहेको छ । जसका लागि नेपालले फेब्रुअरीमा डिभिजन २ खेल्नेछ । नामिवियामा हुने डिभिजन टुमा नेपालसहित युएई, नामिबिया, केन्या, ओमन र क्यानाडाले प्रतिस्पर्धा गर्नेछ । यी ६ वटा टिम मध्ये शीर्ष दुई मा पर्ने टिम विश्वकप छनोटमा प्रवेश गर्नेछन् ।

यसअघि हङकङसँग पराजित भएपछि नेपाल डिभिजन २ मा घटुवा भएको थियो । गत साता युएई पुगेको नेपाली टोलीले अमेरिका र केन्यासँग अभ्यास खेल खेलेको थियो । अभ्यास खेलमा अमेरिकासँग पराजित भएको नेपालले अर्को खेलमा केन्यालाई हराएको थियो ।

चोटका कारण दीपेन्द्र सिहं ऐरीले युएईविरुद्धको दोस्रो खेल पनि गुमाउने छन् । नेपाल र युएईबीचको खेल उक्त खेलको आइसिसीले आफ्नो अफिसियल वेबसाइटमार्फत प्रत्यक्ष प्रशारण गर्ने जनाइएको छ ।

नेपाली क्रिकेट टोली
पारस खड्का (कप्तान), ज्ञानेन्द्र मल्ल (उप कप्तान), शरद भेषावकर, विनोद भण्डारी, वसन्त रेग्मी, शक्ति गौचन, सोमपाल कामी, सागर पुन, करण केसी, दिपेन्द्र सिंह ऐरी, सन्दिप लामिछाने, दिलिप नाथ, ललित भण्डारी, आरिफ शेख