दिल्ली (एजेन्सी) – श्रीलंका विरुद्धको तीन टेस्टको सिरिज घरेलु टोली भारतले आफ्नो पक्षमा पारेको छ । बुधबार अन्तिम टेस्ट बराबरीमा सकिएसँगै दुई टोलीबीचको ३ खेलको टेस्ट सिरिज भारतले १–० ले आफ्नो पक्षमा पारेको हो ।

भारत भ्रमणमा रहेको श्रीलंकाले पहिलो टेस्टमा भारतसँग बराबरी खेलेको थियो । तर, दोस्रो टेस्टमा भारतले श्रीलंकालाई एक इनिङ्स र २ सय ३९ रनले पराजित गरेको थियो । दिल्लीमा भारतले दिएको ४ सय १० रनको लक्ष्यसहित आफ्नो दोस्रो इनिङ्स थालेको श्रीलंकाले अन्तिम दिनसम्म बुधबार १ सय ३ ओभरमा ५ विकेट गुमाएर २ सय ९९ रन बनायो ।

चौथो दिनको खेल समाप्तिसम्म ३१ रन बनाउँदा महत्वपूर्ण ३ विकेट गुमाइसकेको श्रीलंकाले अन्तिम दिन सम्हालिएको प्रदर्शन गर्दै घरेलु टोली भारतलाई बराबरीमा रोक्न सफल भएको हो ।

दोस्रो इनिङ्समा श्रीलंकाका लागि धनन्जय डे सिल्भाले १ सय १९ रन जोडे । रिटायर्ड हर्ट हुनुअघि सिल्भाले २ सय १९ बलमा १५ चौका र १ छक्का प्रहार गरे । त्यस्तै रोशन सिल्भा ७४ तथा निरोशन डिक्वेला ४४ रनमा अविजित रहे । कप्तान दिनेश चण्डिमालले ३६ रन बनाए । भारतका रविन्द्र जडेजाले ३ तथा रविचन्द्र आश्विन र मोहम्मद शामीले समान १–१ विकेट लिएका थिए ।

यसअघि टस जितेर पहिले ब्याटिङ गरेको भारतले आफ्नो दोस्रो इनिङ्समा ५ विकेटको क्षतिमा २ सय ४६ रन बनाएर इनिङ्सको समाप्तिको घोषणा गरेको थियो । भारतका लागि शिखर धवनले ६७, कप्तान विराट कोहली र रोहित शर्माले समान ५०–५० रनको अर्धशतक प्रहार गरेका थिए ।

श्रीलंकाबिरुद्ध भारतले आफ्नो पहिलो इनिङ्समा ५ सय ३६ रन बनाएको थियो । श्रीलंकाले भने आफ्नो पहिलो इनिङ्समा सबै विकेटको क्षतिमा ३ सय ७३ रन मात्रै बनाउन सकेको थियो ।