काठमाडौं (हाम्रो खेलकुद) – मध्यपक्तिका भरपर्दा ब्याट्सम्यान शरद भेषावकर र उपकप्तान ज्ञानेन्द्र मल्लको अर्धशतकको मद्दतमा नेपालले आइसिसी विश्व क्रिकेट लिग च्याम्पियनसिप अन्तर्गतको घरेलु टोली संयुक्त अरब इमिरेट्स (युएई) सँगको पहिलो खेलमा ६ विकेटको क्षेतिमा २ सय २१ रन बनाएको छ ।

टस हारेर ब्याटिङ गर्ने निम्तो पाएको नेपालका लागि ओपनर समेत रहेका ज्ञानेन्द्रले ५४ र शरदले अविजित ८१ रन बनाएपछि नेपालले युएईविरुद्ध सम्मानजनक स्कोर बनाएको हो । ९५ बल खेलेका शरदले ५ चौकाको मद्दतमा ८१ रनको महत्वपूर्ण योगदान गरेका छन् । ८३ बल खेलेका ज्ञानेन्द्रले ५ चौका प्रहार गरे ।

अर्का ओपनर दीलिप नाथले १६ रन बनाए भने कप्तान पारस खडेकाले २० रन जोडे । पारसले ३६ बल खेल्दै ४ चौका प्रहार गरे । सोमपाल कामीले २० रन बनाए भने आरिफ शेख रनको खाता नखोल्दै रन आउट भएका थिए । विनोद भण्डारीले ४ रन जोडे । युएईका लागि जोहार खानले २, मोहम्मद नाभिद, अहमद राजा र रोशन मुस्ताफाले समान १ विकेट लिए ।

नेपाल र युएई यसअघि नै डिभिजन २ मा घटुवा भइसकेका छन् । अब विश्व कपमा छनोट हुने नेपालको सम्भावनाका लागि एउटा मात्र विकल्प रहेको छ । जसका लागि नेपालले फेब्रुअरीमा डिभिजन २ खेल्नेछ । च्याम्पियनसिपको शीर्ष चारमा रहने टोलीले विश्वकप छनोट खेल्न पाउनेछन् ।

तर नेपाल अबका दुई खेल जित्दा पनि शीर्ष ४ मा पर्ने छैन । यसअघिको खेलमा हङकङसँग पराजित भएपछि नेपाल डिभिजन २ मा घटुवा भएको थियो । गत साता युएई पुगेको नेपाली टोलीले अमेरिका र केन्यासँग अभ्यास खेल खेलेको थियो । अभ्यास खेलमा अमेरिकासँग पराजित भएको नेपालले अर्को खेलमा केन्यालाई हराएको थियो ।