काठमाडौं (हाम्रो खेलकुद)– नेपालले आइसीसी महिला टि–ट्वान्टी विश्वकप क्रिकेट अन्तर्गत एसिया क्षेत्रको छनोटको अन्तिम खेल चीनलाई ५० रनले हराएको छ । १ सय ३ रनको लक्ष्य पछ्याएको चीन १८.२ ओभरमा ५२ रन जोड्दै अलआउट भएको थियो ।

नेपाली बलरहरुका सामू चीनका कुनै पनि खेलाडी लामो समय टिक्न सकेनन् । कप्तान रुविना क्षेत्री र सबनम राईले समान ३ विकेट लिए । सिता राना मगरले २ र रितु कनौजियाले समान १ विकेट लिए । थाइल्यान्डका २ खेलाडीले मात्र दोहोरो आँकडामा रन बनाउन सके । हान लिलीले १५ र सी जाउले १० रन जोडिन् ।

थाइल्यान्डको बैंककस्थित एसियन इन्स्टिच्युट अफ टेक्नोलोजी मैदानमा चीनले टस जितेर नेपाललाई ब्याटिङको आमन्त्रण गरेको थियो । नेपाली टोलीले निर्धारित २० ओभरमा ८ विकेट गुमाएर १ सय २ बनाएको थियो ।

नेपालका लागि तीन खेलाडीले खेलाडीले दोहोरो आँकडामा रन बटुलेका थिए । कप्तान रुविना क्षेत्रीले अविजित १८ रन बनाइन् भने रनआउट हुनुअघि काजल श्रेष्ठले १६ रन, र नेरी थापाले ११ रन बनाइन् ।

रुविनाले २ चौका तथा काजल र नेरी दुवैले समान १ चौका प्रहार गरे । ओपनर ज्योति पाण्डेले ९, सरिता मगरले ८ रन, सिता राना मगरले ४, रितु कनौजिया र इन्दु बर्माले समान ६ रन जोडे । रोमा थापाले ३ रन बनाइन् । करुणा भण्डारीले अविजित २ रन जोडिन् । चीनका लागि झाङले ३ विकेट लिइन् ।

वर्षाका कारण सुरुआती दुई खेलमा अंक बाँडेको नेपालले अर्को खेलमा संयुक्त अरब इमिरेट्स (युएइ) सँग पराजित भएपछि नेपालको छनोट हुने सम्भावना कमजोर भएको थियो । नेपालले पछिल्लो खेलमा भने मलेसियालाई ३३ रनले हराएको थियो । छनोटको अन्तिम खेलमा कमजोर टोली चीनलाई हराएपनि नेपालले छनोट हुनका लागि अन्य खेलको नतिजामा भर पर्नुपर्ने हुन्छ । ५ खेलमा नेपालको ६ अंक पुगेको छ । चीन अंकविहिन रहँदै पुछारमा छ ।

७ अंकसहित थाइल्यान्ड शीर्षस्थानमा छ भने दोस्रो स्थानको युएईको ६ अंक छ । हङकङ ५ अंकसहित तेस्रो स्थानमा रहेको छ । छनोटमा २ अंक जोडेको मलेसिया पाँचौं स्थानमा रहेको छ ।आयोजक थाइल्याण्ड र हङकङ तथा मलेसिया र युएईबीचको खेल आफु अनुकुल नतिजा आए मात्र नेपाल अघिल्लो चरण पुग्ने सम्भावना रहन्छ ।